Nga Boldnews.al
Në maj të vitit 2022, Komisioni i Prokurimit Publik (KPP) i dha të drejtën kompanisë “Alko Impeks” të shpallet fituese e një tenderi me vlerë mbi 2.5 milionë euro për pastrimin e Himarës.
Ky vendim është rrëzuar së fundmi nga Gjykata Administrative e Apelit, e cila ka konstatuar se qëndrimi i Komisionit të Prokurimit Publik nuk është mbështetur në ligj, pra, më thjesht, është i paligjshëm.
Por, edhe pse gjykata arriti në këtë konkluzion, ajo ishte e pafuqishme për të ndryshuar rrjedhën e transferimit të parave nga Bashkia Himarë tek kompania e familjes Abazi.
Gjykata e Apelit Administrativ, me një vendim të marrë në 25 Shtator 2023, konstatoi se tashmë kontrata mes Bashkisë së Himarës e “Alko Impeks” është miratuar dhe madje ka nisur edhe zbatimin e saj në terren.
Megjithatë, vendimi i gjykatës është një dëshmi më shumë për të zbërthyer një lloj “flirti” ndërmjet kompanisë së familjes Abazi dhe Komisionit të Prokurimit Publik (KPP).
Kompania e menaxhuar nga Arbër Abazi, nipi i ish-deputetit socialist, Sadri Abazi, ishte skualifikuar nga autoriteti kontraktor, Bashkia Himarë, në tenderin e zhvilluar në prill të atij viti.
Por, KPP vlerësoi se kompania e familjes Abazi duhej shpallur fitues. Ky vendim, i miratuar në 16 Maj 2022, është pjesë e një grupi aktesh të Komisionit të Prokurimit Publik, të cilat kanë shkuar të gjitha në favor të “Alko Impeks”.
“Boldnews.al” ka raportuar më herët se, gjatë periudhës 2022-2023, KPP ka dhënë 7 vendime ku ka qenë përfshirë ‘Alko Impekst General” dhe në çdo rast vendimmarrja ka qenë pro kompanisë së familjes Abazi.
Ka nga ata që besojnë se kjo situata lidhet me një lloj “raporti të ngrohtë” mes kompanisë private dhe kreut të KPP-së, Jonaid Myzyri, i cili, sipas denoncimeve të opozitës, më parë ka punuar si jurist në kompaninë “Alko Impeks”.
Tenderi i pastrimit të Himarës
Ndërmarrja e Shërbimeve Publike, Bashkia Himarë, në cilësinë e Autoritet Kontraktor, ka publikuar më datë 01.03.2022, në portalin elektronik të prokurimeve publike, procedurën e hapur mbi kufirin e lartë monetar të konkurimit, me numër reference REF-20775-02-28-2022, me objekt: “Marrëveshje kuadër me kohëzgjatje 36 (tridhjetë e gjashtë) muaj: “Shërbimi i pastrimit të territorit të Bashkisë Himarë”, me fond limit 289.647.042 lekë pa TVSH.
Më datë 19.04.2022, Autoriteti Kontraktor rezulton të ketë kryer vlerësimin e ofertave, duke skualifikuar bashkimin e operatorëve ekonomikë “Alko Impex General Construction” dhe “Alko Impex Construction” sh.p.k., të dyja nën menaxhimin nga familjarë të Sadri Abazit.
Vetëm dy ditë më pas, kompania private e ankimon vendimin e skualifikimit njëkohësisht pranë Bashkisë së Himarës dhe Komisionit të Prokurimit Publik.
Bashkia e Himarës, në 29 Prill 2022, vendos të mos pranojë ankesën, duke kualifikuar kompani të tjera, pjesëmarrëse në tender.
Ndërkohë, Komisioni i Prokurimit Publik, me vendimin e datës 16 Maj 2022 ka vendosur të pranojë ankesën e bashkimit të operatorëve dhe të detyrojë Bashkinë e Himarës që të kualifikojë në tender “Alko Impeks General Conctruction” dhe “Alko Impeks Construction”.
Pas këtij vendimi, pjesëmarrësit e tjerë në garë e ankimojnë vendimin e marrë nga KPP e Jonaid Myzyrit në Gjykatën Administrative të Apelit.
Ndërkohë, Bashkia e Himarës, pas vendimit të Komisionit të Prokurimit Publik, nënshkroi kontratën mbi 2.5 milionë euro me kompanitë e familjes Abazi.
Vendimi i gjykatës
Pasi shqyrtoi provat dhe faktet, Gjykata e Apelit Administrativ mbërriti në përfundimin se, vendimi i Bashkisë së Himarës për skualifikimin e kompanive të familjes Abazi ishte i drejtë, përsa kohë ato nuk plotësonin kriteret e përcaktuara në dokumentat e tenderit.
Po ashtu, gjykata vlerësoi se vendimi i Komisionit të Prokurimit Publik, dt. 16.05.2022, me të cilin u vendos në favor të “Alko Impeks” është marrë në kundërshtim me ligjin dhe si i tillë duhet shfuqizuar.
Por, në kushtet kur Bashkia e Himarës ka nënshkruar kontratën me “Alko Impeks” dhe shërbimi i pastrimit është në vijim, gjykata u gjend në kushtet e pamundësisë për të ndryshuar situatën.
Gjykata e Apelit Administrativ, “në raport me zgjidhjen e pasojave….vëren se, në kushtet e kualifikimit tashmë të personit të tretë (“Alko Impeks”, shën.red) dhe vijimit të ekzekutimit të kontratës publike të lidhur me të, konsideron vetëm kthimin në Buxhetin e Shtetit, të tarifës që pala e tretë kishte parapaguar në funksion të shqyrtimit administrativisht të ankimit…”, thuhet në vendimin e togave të zeza, të datës 25 Shtator 2023.
