Urdhri i Stomatologëve të Shqipërisë ka reaguar pas rastit të vdekjes së 3-vjeçarit, pas ndërhyrjes që bëri nga Roland Xhaxho.
Urdhri i Stomatologëve me anë të një postimi kanë kërkuar të gjitha të dhënat e mjekimit të aplikuara ndaj tij.
Po ashtu USSH thekson se nuk ka ende dijeni për emrin e stomatologut që ka kryer ndërhyrjen dentare të vogëlushit dhe është e pashpjegueshme kjo mungesë e emrit të stomatologut kurues.
Njoftimi zyrtar nga Urdhri i Stomatologëve të Shqipërisë:
“Urdhri i Stomatologëve të Shqipërisë kërkon publikisht e zyrtarisht nga stomatologu që ka kryer mjekimin dentar, të gjitha të dhënat e mjekimit, përfshirë protokollin e mjekimit që është aplikuar për vogëlushin e ndjerë Brian Spahiu, grafitë para e pas mjekimit etj, sipas kërkesave të Komisionit Disiplinor që është ngritur posaçërisht për këtë çështje. Stomatologu kurues të sigurojë urgjentisht kontaktet me sekretarinë e Rajonit të USSH Tiranë.
Urdhri i Stomatologëve të Shqipërisë nuk ka ende dijeni për emrin e stomatologut që ka kryer ndërhyrjen dentare të vogëlushit dhe është e pashpjegueshme dhe penalizuese kjo mungesë e emrit të stomatologut kurues, mosprezenca në media edhe mosparqitja në zyrat e Urdhrit të Stomatologëve të Shqipërisë.
Deri tani Urdhri i Stomatologëve të Shqipërisë ka ndjekur me tepër vëmendje reanimatorin Prof.Xhaxho, për të cilin nuk kemi asnjë koment, por për Prof.Xhaxho do të ishte tepër e domosdoshme, ligjore, etike dhe korrekte që në daljen e tij mediatike të ishte sëbashku me stomatologun që bëri mjekimin si në çdo rast tjetër të ngjashëm e simetrik. Urdhri i Stomatologëve të Shqipërisë ka tagrin ligjor e statutor të informohet imtësisht nga stomatologu që ka kryer ndërhyrjen dentare, ndërkohë që akoma s’ka një emër konkret.”, thuhet në njoftim.
- Ngjarja e rëndë e 5 tetorit
Një ngjarje e rëndë është regjistruar në Tiranë me 5 tetor, ku ka ndërruar jetë tragjikisht një 3-vjeçar i quajtur Brian Spahiu, pas vizitës tek dentisti në një klinikë tek “Rruga e Kavajës, ku ka trajtuar dhëmbët në gjendje anestezie. Babai i vogëlushit, Guri Spahiu ka denoncuar në Polici mjekun Roland Xhaxho dhe vajzën e tij Ina Xhaxho.
Pas vizitës tek dentisti, vogëlushi ka qëndruar për disa ditë në gjendje kome dhe në momentin që është dërguar në spital, prindërit pretendojnë se mjekët u kanë thënë se i është helmuar mëlçia nga narkoza. Fatkeqësisht vogëlushi ka ndërruar jetë.
Policia ka proceduar penalisht mjekun Roland Xhaxho për veprën penale “Mjekimi i pakujdesshëm”.
“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin R. Xh., 70 vjeç, banues në Tiranë, për veprën penale “Mjekimi i pakujdesshëm”, pasi ka bërë kallëzim shtetasi B. S. se shtetasi R. Xh. ka mjekuar në mënyrë të pakujdesshme në klinikën e tij private, djalin 3-vjeçar të shtetasit B. S., i cili pas mjekimit në këtë klinikë ka shfaqur komplikacione dhe pas 3 ditësh, ka humbur jetën, në spital.” – njofton Policia.
Në një deklaratë për mediat, gjyshi i 3-vjeçarit që ndërroi jetë tragjikisht ka deklaruar se mjeku Roland Xhaxho u ka thënë ta dërgojnë në shtëpi. Ai tregon se pasi e kanë dërguar në shtëpi, fëmija filloi të zverdhej dhe temepratura i shkoi në 39.5. Ai tregon më tej se mjeku nuk u hapte më as telefonin.
“Nuk ka patur probleme më parë. Kemi bërë kallëzim, ne kërkojmë që ai të dënohet. Nga shteti në rast të kundërt mos na shkatërroni ne. As policia e Shtetit as Ministria e Shëndetësisë nuk e ka bërë problem por kanë vepruar fshehur për interesa të tyre. Duam drejtësi. Djali ka qenë në gjendje shumë të mirë nuk ka patur ndonjë problem më parë. E dërguam në shtëpi, sepse mjeku na tha se nuk ka problem se rreth 10 minuta 30 minuta i kalon narkoza tha se nuk ka problem. Djali ka ndenjtur në shtëpi, filloi të zverdhej ishte në koma. Filloi temperatura 39.5 emorëm mjekun në telefon se hapte as telefonin që ta pyesnim çfarë të bënim.”- tha gjyshi i 3-vjeçarit.
Ndërkohë, daja i Brianti ka treguar detajet e ngjarjes të rëndë, teksa akuzon si vrasës mjekun Roland Xhaxho dhe vajzën e tij Ina Xhaxho. Ai thotë se mjeku e ka mbajtur rreth 3-4 orë në sallën e anestezisë dhe u ka dorëzuar në gjendje kome vogëlushin. Mjeku u ka thënë prindërve se nuk ka asnjë problem se e ka nga narkoza.
“Jam daja i djalit. Djali kishte probleme me nja 3 a 4 dhëmbë të prishur. Ankoheshe gjithmonë më dhëmb dhëmballa dhe nuk hante bukë. Pyetëm shumë veta me anestezi dhe me mjekë zemre dhe vajtëm tek Roland Xhaxho e pyetëm 2-3 herë na tha s’ka asnjë problem. E çuam çunin për t’i rregulluar dhëmbët, ku bashkë me gocën e vetë i ka bërë 14 dhëmbë çunit që ia ka trajtuar dhe e ka mbajtur rreth 3 orë e gjysmë – 4 orë në sallë. Na e ka dhënë çunin në gjendje kome dhe na gënjeu që çuni është mirë, mos u bëni merak, kjo është gjendje e narkozës, kur ndërkohë çuni ishte në gjendje të rënduar, në gjendje kome. Kur e çuam në pavijonin e pediatrisë, e futën çunin direkt në reanimacion pa oksigjen pa puls. E pa doktoresha, sa i pa pulsin e dobët tha direkt për në reanimacion. Mjekët atje u munduan bënë të pamundurën. Kur doli ai mjeku atje na tha se po ta kishit sjellë çunin dy orë më para, nuk do ta kishit në këtë gjendje, sepse çunit i kishte helmuar mëlçinë. Vrasësi është Roland Xhaxho dhe Ina Xhaxho, dy vrarsësit, ju lutem që të sensibilizohen edhe njerëzit që kujt i ka ndodhur kjo fatkeqësi, të bëjmë të pamundurën që ai të mos e kalojë kaq lehtë.” – është shprehur daja e Brianit.