Ish-luftëtari i UÇK-së Dritan Goxhaj është liruar nga qelia dhe nuk do të ekstradohet në Kosovë.
Gjyqtari i Apelit Genti Shala ka rrëzuar vendimin e Gjykatës së Tiranës, duke refuzuar ekstradimin e Goxhajt dhe shuar masën e sigurisë arrest me burg ndaj tij.
Arrestimi dhe lënia në qeli
Goxhaj u arrestua nga policia shqiptare më 31 korrik nën akuzën e “kanosjes gjatë procedimit penal” dhe “pengimit të zyrtarëve në kryerjen e detyrave zyrtare”.
Ndalimi u krye në Tiranë, në bazë të një urdhër-arresti të lëshuar nga Dhomat e Specializuara të Kosovës me seli në Hagë, që po gjykon ish-luftëtarë të UÇK-së për krime të kryera gjatë dhe menjëherë pas luftës së viteve 1998-1999, duke shënuar rastin e parë në Dhomat e Specializuara të Kosovës ku arrestohet një shqiptar nga Shqipëria.
Avokati i tij shpjegoi se Goxhaj ishte akuzuar për një artikull që ai shkroi për një media ku ekspozonte emrat e disa prej dëshmitarëve të mbrojtur të mundshëm në një gjyq për krime lufte të një ish-guerrili të UÇK-së në Hagë.
Pas arrestimit, Dritan Goxhaj u la në qeli nga gjykata e Tiranës, që më 19 shtator caktoi ndaj tij masën e sigurisë së arrestit me burg.
Në Tiranë, nga shoqëria civile ka pasur protesta në të cilat është kërkuar lirimi i Goxhajt nga burgu.
Lirimi
Vendimi i gjykatës së Tiranës u ankimiua në Apel nga mbrojtja. Avokati i Goxhajt kërkoi prishjen e vendimit të gjykatës së shkallës së parë, deklarimin e pafajshëm dhe moslejimin e ekstradimit të tij nga Shqipëria në Kosovë.
Këtë të Hënë, Gjyqtari i Apelit Genti Shala vendosi rrëzimin e vendimit të shkallës së parë, duke refuzuar kërkesën për ekstradimin dhe hequr masën e arrestit me burg për Goxhaj, i cili me këtë verdikt rifiton lirinë.