Katër persona janë vënë nën hetim këtë të hënë nga policia në Bulqizë dhe Klos pasi akuzohen për prerje pyjesh pa kriter.
Blutë bëjnë me dije se hetimi nga nisur për shtetasit B.H., 23 vjeç, dhe A.I., 38 vjeç, banues në Ostren, Bulqizë, pasi janë kapur duke prerë dru në mënyrë të paligjshme.
“Shërbimet e Komisariatit të Policisë Bulqizë në bashkëpunim me shërbimet e Policisë Kufitare në Viçisht, kanë evidentuar dhe goditur një tjetër rast të prerjes së paligjshme të pyjeve. Si rezultat u referuan materialet në Prokurori ku filloi procedimi në gjendje të lirë për shtetasit B.H., 23 vjeç, dhe A.I., 38 vjeç, banues në Ostren, Bulqizë.
Këta shtetas u kapën nga shërbimet e Policisë, në vendin e quajtur “Fusha e Klenjës”, duke prerë lëndë drusore, në mënyrë të paligjshme. Sasia e lëndës drusore dhe automjeti tip kamionçinë që do ti transportonte, u sekuestruan në cilësinë e provës materiale.”,- njofton Policia.
Gjithashtu hetimi ka nisur edhe për shtetasit M.B., 74 vjeç, dhe H.P., 40 vjeç, banues në Klos, pasi kanë prerë 30 pemë në tokën në pronësi të një shtetasi tjetër.
“-Specialistët për Hetimin e Krimeve të Komisariatit të Policisë Mat, referuan materialet në Prokurori ku filloi procedimi penal për shtetasit, M.B., 74 vjeç, dhe H.P., 40 vjeç, banues në Klos, pasi në bashkëpunim me njëri tjetrin kanë prerë 30 pemë në tokën në pronësi të shtetasit Rr.S”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
