Mesfushori Ylber Ramadani, foli në konferencë për shtyp, pas grumbullimit me Shqipërinë, për ndeshjen ndaj Çekisë, të vlefshme për kualifikueset e Europianit.
Ramadani tha se kualifikimi në Europian, do të ishte një arritje e madhe për të gjithë, ndërsa shtoi se përballë është një kundërshtar i vështirë. Gjithsesi mesfushori deklaroi se skuadra futet në fushë vetëm për fitore.
“Nëse arrijmë Europianin është një gjë e madhe për mua, për gjithë Shqipërinë, për familjen time. Edhe atje në Itali jam duke u paraqitur mirë. Shpresoj të vazhdoj kështu. Kemi ardhur me mentalitetin e duhur. Është një ndeshje shumë e vështirë, nuk është ndeshje e lehtë, pasi kundërshtari është i fortë. Kanë pësuar vetëm dy gola, por ne duhet të futemi në fushë vetëm me qasjen e duhur, pa eufori dhe ta bëjmë maksimumin e të marrim rezultatin pozitiv. Ndeshja në shtëpi është më ndryshe, pasi luajmë në fushën tonë, kemi tifozët tanë që na përkrahin shumë. Do hyjmë më ndryshe në fushë, do hyjmë për ta fituar ndeshjen”.
Ramadani, nuk kërkon të bëjë llogari dhe tha se përpara janë edhe tre finale për Shqipërinë, ndërsa Çekinë e konsideroi si kundërshtarin më të vështirë në grup.
“Normalisht ne do hyjmë në fushë për më shumë, pasi kemi tre finale dhe kjo është njëra prej tyre. Do hyjmë të japim maksimumin, pasi e dimë çfarë na pret po e morëm rezultatin pozitiv. Janë edhe tre ndeshje, siç thashë edhe më parë janë tre finale. Llogaritë do të bëhen pastaj. Ne duhet të hyjmë në këtë ndeshje të bëjmë maksimumin sepse është ndeshje e rëndësishme, sikurse edhe dy të tjerat. Shpresojmë të bëjmë mirë, pastaj në fund bëhen llogaritë. Ata janë të dytë në grup, janë ekip shumë i fortë fizikisht. Ata janë treguar më të fortë se Polonia dhe normalisht që janë kundërshtari ynë”.
27-vjeçari, kishte edhe një thirrje për tifozët që do të jenë në stadium.
“Normalisht do u lutesha tifozëve që të mos hedhin sende në fushë, sepse na duhen për ndeshjet e radhës. Ata janë lojtari i 12-të i joni dhe mendoj se do ishte mirë të jenë me ne gjithmonë. Nuk duam t’i humbim nga sendet e hedhura në fushë”.
