Policia e Shtetit dhe Inspektorati Kombëtar i Mbrojtjes së Territorit mësyjnë në Rolling Hills.
Siç shihet nga pamjet, ekskavatorët e IKMT kanë nisur prishjet e ndërtimeve pa leje dhe shtesave, në zonën e vilave në Lundër, ndërsa në mbështetje kanë qenë dhe njësitë e Policisë së Tiranës.
Gjithashtu policia ka vendosur shiritin e sigurisë duke mos lejuar qytetarët pranë vendeve ku po ndërhyhet me mjetet e rënda.
Nuk dihet ende sa është numri i objekteve që pritet të shkatërrohen nga fadromat e IKMT, teksa në zonë ka një numër të madh të forcave të policisë dhe punonjësve të IKMT-së.
Vilat e “Rolling Hills” janë ndër më të shtrenjtat në Shqipëri dhe ndodhen në periferi të Tiranës. Aty jetojnë personazhe të njohur të politikës, biznesit, medias dhe jo vetëm.
Për operacionin i sotëm në lagjen e pasanikëve ka reaguar edhe ministri i Brendshëm, Taulant Balla, i cili ndër të tjera shkruan:
“Policia e Shtetit dhe Inspektoriati Kombëtar i Mbrojtjes së Territorit po angazhohen çdo ditë për dhënien fund të ndërtimeve, shtesave pa leje dhe çdo shfaqje tjeter abuzive, pa asnjë dallim se ku ndodhet apo kush e zotëron. Të gjithë duhet të japin llogari para ligjit dhe askush nuk mund të shpërfillë me arrogancë komunitetet, duke ndërtuar pa leje. Na duhet një angazhim edhe më i madh i të gjitha bashkive dhe agjencive për identifikimin, penalizimin, shembjen apo konfiskimin për interes publik të të gjitha sipërfaqeve në pallate, qendra biznesi, hotele të ndërtuara në shkelje të ligjit. Të gjitha katet e konfiskuara do të shkojnë për strehim social apo për mjedise pune për institucionet publike”
