Rreth 106 tifozë të ekipeve “KF Tirana” dhe “KF Vllaznia” janë shoqëruar në komisariat, pasi në përfundim të sfidës janë përleshur me njëri-tjetrin në Rrugën e Kombit.
“Në vijim të veprimeve procedurale për paligjshmëritë e kryera (konflikt fizik dhe dëmtim të autubusëve me të cilët udhëtonin), u arrestuan në flagrancë shtetasit: Klejvi Xeka, 20 vjeç, Klejdi Zyka,18 vjeç, Renato Markgjoni, 18 vjeç, Ismail Asllan., 18 vjeç, Klodian Dumi, 38 vjeç, Rakip Lala, 18 vjeç, Fabjon Kurti, 18 vjeç dhe Frensi Shehi, 20 vjeç. Gjithashtu, janë referuar materialet në Prokurori ku nisi procedimi në gjendje të lirë për 20 tifozë të tjerë, nga të dyja ekipet”, thuhet në njoftim.
Policia njofton se shërbimet e Drejtorisë Vendore të Policisë Lezhë dhe ato të komisariateve në varësi të saj, sapo janë njoftuar se në Rrugën e Kombit, tifozët e 2 skuadrave të futbollit në vendin tonë, po konfliktoheshin fizikisht, kanë organizuar punën dhe kanë mbërritur menjëherë në vendngjarje, ku kanë bërë të mundur identifikimin dhe shoqërimin në ambientet e Policisë të 106 tifozëve nga të dyja ekipet të përfshirë në konflikt.
Ndërkaq, tifozët e tjerë të shoqëruar, në përfundim të veprimeve procedurale, janë lënë të lirë. Dy tifo-grupet u konfliktuan ditën e djehsme me sende të forta, pas përfundimit të ndeshjes mes Tiranës dhe Vllaznisë. Ditën e djehsme u raportua po ashtu se 4 tifozë kishin përfunduar në spital.
Materialet procedurale i kaluan Prokurorisë pranë Gjykatës së Shkalles së Parë të Juridiksionit të Përgjithshëm Lezhë, për veprime të mëtejshme, për veprat penale “Plagosja e lehtë me dashje”, “Prishja e qetësisë publike” dhe “Shkaterrimi i pronës”, të kryera në bashkëpunim.
