Hetuesit francezë ngritën akuza paraprake të premten kundër ish-Presidentit Nicolas Sarkozy për përfshirjen e tij në përpjekje për të mashtruar gjyqtarët në mënyrë që ta lironin në një çështje që ka lidhje me financimin e dyshuar të paligjshëm nga Libia gjatë fushatës presidenciale të vitit 2007.
Akuzat paraprake ndaj Sarkozy janë për “përfitim nga ndikimi korruptiv mbi një dëshmitar” dhe “pjesëmarrje në një shoqatë kriminale” me qëllim “të mashtrojë magjistratët përgjegjës për hetimin gjyqësor mbi dyshimet për financimin libian të fushatës së tij zgjedhore”, sipas një deklarate nga prokuroria.
Nga ana e tij Sarkozy ka mohuar çdo përfshirje. Ndërsa avokatët e tij thanë në një deklaratë të premten se ish-Presidenti është i vendosur të mbrojë të drejtat e tij, të provojë të vërtetën dhe të mbrojë nderin e tij.
Sipas ligjit francez, akuzat paraprake nënkuptojnë se ka arsye për të dyshuar se është kryer një krim, por kjo u jep gjyqtarëve më shumë kohë për të hetuar përpara se të vendosin nëse do ta dërgojnë çështjen në gjyq.
Mediat franceze raportojnë se Sarkozy dyshohet se ka dhënë dritën jeshile, ose ka lejuar disa persona ta bëjnë këtë, në lidhje me një përpjekje mashtruese për ta liruar atë në të ashtuquajturin rast libian.
Sarkozy dhe 12 persona të tjerë do të dalin në gjyq në fillim të vitit 2025 të akuzuar se fushata e presidenciale e vitit 2007 përfitoi miliona financime të paligjshme nga qeveria e liderit libian Moammar Gadafi.
Sarkozy ka qenë nën hetim në çështjen e Libisë që nga viti 2013. Ai akuzohet për financim të paligjshëm të fushatës, përvetësim dhe korrupsion pasiv.
Hetuesit shqyrtuan pretendimet se qeveria e Gadafit i dha Sarkozy fshehurazi 50 milionë euro për fushatën fituese të vitit 2007.
Shuma ishte më shumë se dyfishi i kufirit ligjor i financimit të fushatës në atë kohë dhe shkelte rregullat franceze kundër financimit të fushatës nga shtete të huaja.
