Klubi i Tiranës përmes një komunikate në faqen zyrtare ka zyrtarizuar pezullimin e trajnerit Orges Shehi si trajner i bardhebluve, por ajo që çudit është se kontrata mes palëve do të vazhdojë.
Pra, Tirana pranon ta paguaj Shehin, sipas kontratës, duke mos e lënë të marrë drejtimin e ndonjë klubi tjetër, edhe pse nuk është trajner në detyrë.
Duke ditur se Shehu lakmohet nga rivalët e kuq, Tirana i bën bllokadë Partizanit. Në këto kushte, nëse Shehi vendos të largohet në një skuadër tjetër, duhet të gjejë fillimisht akordin me Tiranën.
Gjithashtu, Partizani, apo çdo skuadër tjetër që mund të jetë i interesuar për shërbimet e Shehit duhet të kontaktojë fillimisht me klubin e Tiranës, për të paguar për shërbimet e Shehit apo për të gjetur një akord.
Ja njoftimi i klubit:
“Pas shqyrtimit të rrethanave, lidhur me situatën sportive dhe rezultateve të dobëta në të cilën ndodhet klubi aktualisht, bazuar në Kontratën individuale të punës, Klubi i Futbollit Tirana ka vendosur të pezullojë nga detyra trajnerin Orges Shehi.
Gjithashtu, klubi njofton se do të vazhdojë marrëdhënien kontraktuale me trajnerin Shehi deri në përfundimin e saj.”
