Autoritetet spanjolle kanë goditur këtë të enjte një grup shqiptarësh, përgjegjës për kultivimin dhe shitjen e kanabisit.
Në pranga kanë rënë 21 shtetas, të cilët kontrollonin dhjetëra plantacione kanabisi përgjatë bregdetit katalanas, nga El Masnou në Miami Platja,- shkruajnë mediat e huaja.
Kreu i grupit ishte një burrë me kombësi shqiptare, i cili prej vitesh jetonte në një apartament në Salou. Raportohet se ai posedonte sasi të mëdha parash, të cilat nuk mund t’i shpenzonte dot në prona. Mediat spanjolle shkruajnë se ai shpenzonte paratë për veshje të shtrenjta, bizhuteri dhe automjete.
Nga ana tjetër në plantacionet e kanabisit që ai drejtonte, punëtorët detyroheshin të punonin për muaj me radhë të mbyllur brenda në magazinë ose në shtëpinë ku ndodhej plantacioni, pa ujë të pijshëm, pa sistem ngrohjeje dhe në kushte të rënda.
Raportohet se anëtarët e grupit ruheshin nga autoritetet dhe grabitjet e mundshme duke instaluar kamera në çdo plantacion dhe duke vendosur detektorë lëvizjeje.
Të arrestuarit pritet të dalin para drejtësisë.
