Kreu i grupit parlamentar të PD-së, Gazment Bardhi dhe kreu i PD-së së vulës Lulzim Basha, janë përfshirë në një debat me akuza të forta ditën e sotme në Kuvend, ku shkaku ka qenë rihapja edhe një herë e diskutimit nga ana e Bashës se kujt i takon kreu i grupit parlamentar të PD-së.
Basha e akuzoi Bardhin si të lidhur me aleancën e kullës 54 kate, ndërsa ky i fundit i tha se është bërë pronar i dy kateve në kullën më të shtrenjtë të Tiranës.
Pas daljes nga Kuvendi, Bardhi në prononcimin e dhënë për gazetarët ka dhënë detaje të tjera në lidhje me akuzat ndaj Bashës. Sipas tij, bëhet fjalë për kullën “Lion Residence” në hyrje të parkut tek Liqeni Artificial.
Bardhi tha se Basha dy katet e apartamenteve i ka marrë me kontratë porosie vetëm një muaj pasi humbi zgjedhjet e vitit 2021, teksa sipas tij, tani ai më shumë koha kalon në zyrën e arkitekturës për mobilimin e apartamenteve, se sa bën opozitë. Bardhi e sfidoi Bashën që ta hedhë në gjyq për shpifje, teksa “e thumboi” duke i thënë se mos e bëjë si në rastin me Erion Veliaj në rastin e akuzave për 4 vilat, ku pasi e hodhi në gjyq për shpifje nuk u paraqit më.
Sa i përket akuzave për lidhje me kullën 64 kate ndaj tij, Bardhi deklaroi se ka qenë Basha, ai i cili e ka takuar pronarin e asaj kulle në garazhdin e apartamentit të kullës ku ai banon për t’i kërkuar ndjesë.
“Situatë si kjo e sotmja e provokuar tërësisht nga zoti Basha janë të përsëritura sa herë kur mazhoranca është në vështirësi. Ju e mbani mënd, ditën që McGonigal pranoi fajësinë, i kurdisur si ato lodrat në kohën e komuzimit nga Edi Rama dhe Erion Veliaj, zoti Basha erdhi në Kuvend dhe në vend që të merrej me këtë çështje ngriti shqetësimin e grupit parlamentar të PD. Edhe sot, ku Edi Rama duhej të mbahej përgjegjës për deklaratat skandaloze në raport me Kosovën, i kurdisur nga Taulant Balla, vjen në Kuvend dhe krejt befas dhe papritur ngre një shqetësim që është i tejkaluar për grupin parlamentar të PD. Kryetarja e Kuvendit e ka opinionit e drejtorisë juridike. Basha e di shumë mirë se cili është opinioni i drejtorisë juridike dhe drejtorisë së Kuvendit. Basha e di shumë mirë se si është rregullorja e parlamentit, kushtetuta dhe legjislacioni në fuqi. Por, ka interes që sa herë mazhorancës i duhet për të zhvendosur vëmendjen të vijë në Kuvend një herë në muaj dhe të ngrejë të njëjtën çështje.
Por, sa herë që do të hedhë fjali në ajër që nuk ja kupton rëndësinë e asaj që thotë do të duhet të ballafaqohet me të vërtetën. Dhe e vërteta është që në 2021 demokratët luftonin për të bërë zotin Basha kryeministër të Shqipërisë, ndërkohë që z.Basha një muaj pasi humbi zgjedhjet, i fut një kontratë me porosi për dy kate në kullën më të shtrenjtë të Tiranës, është kulla në hyrje të liqenit.
Pasi rikthehet, në thonjza, me vetëshpallje kryetar partie, në vend që të merret me opozitë, më shumë kalon kohë në zyrën e arkitekturës për mobilimin e apartamenteve dhe njësive tregtare, sesa me të bërin opozitë.
Herë tjetër do të duhet t’i bëjë llogaritë mirë kur hedh fjali pa lidhje në Kuvend. Unë nuk jam përfaqësuesi i asnjë aleance, jam përfaqësues i qytetarëve të ndershëm të këtij vendi dhe Basha e di shumë mirë këtë gjë. Nuk jam avokat i askujt, siç është ai avokat i Taulant Ballës dhe Edi Ramës. Jam avokat vetëm i vetes time.
Dhe sa i takon kullës 64 kate, nuk kam shkuar unë në garazhdet e apartamentit të pronarit të kullës për t’i kërkuar ndjesë. Ka shkuar zoti Basha në garazhdin e apartamentit ku banon pronari i kullës 64 kate për t’i kërkuar ndjesë.
Kur të dalë këtu të mos shtiret, ku fillimisht të thotë shpifje dhe pastaj të thotë transaksionet janë transparente. Se në fakt transaksionet nuk janë transparente. Basha i di shumë mirë këtë gjë dhe nëse unë kam shpifur, e sfidoj të më çojë në gjykatë. Vetëm të mos e bëjë siç e bëri me Erion Veliajn që harroi më pas të shkonte në gjykatë për të vijuar gjyqin për shpifje për 4 vilat që e akuzoi Veliaj. Sepse do të duhet të vijë të përballet me të vërtetën dhe e vërteta është kjo që po them unë. Familjarët e zotit Basha janë e vetmja aleancë me kullat, për sa kohë sot janë pronarë të dy kateve në kullën më të shtrenjtë të Tiranës “Lion Residence”. Merrni kamerat tani dhe shkojeni verifikojeni se kush janë pronarët nga kati i parë tek i fundit i njësive tregtare dhe apartamenteve në atë rezidencë dhe pastaj të vijë të më flasë mua në Kuvend për aleancë me kullat.” – u shpreh Bardhi.
Ndërsa Basha, i pyetur nga gazetarët në lidhje me këto akuza të Bardhit, është shprehur pas daljes nga Kuvendi se familjarët e tij çdo gjë e kanë transparente dhe e deklarojnë cent më cent taksat.
“Përgjigja ime ishte aty. Është shpifje e pastër e shkollës berishiste. Vjen nga një njeri që sulmonte babain e Zenit dhe sot është bërë avokat dhe i kullave 64 katëshe. Familjarët e mi e kanë çdo gjë transparente, cent më cent taksat ndryshe nga aleancat e kullave dhe avokati i tyre më i ri, Gaz Bardhi”, tha Basha.
