Nga Boldnews.al
Policia e Elbasanit tha mëngjesin e së Enjtes se ka sekuestruar disa pasuri të Eris Skënderit nga Cërriku, nën dyshimet se janë krijuar nga aktiviteti i paligjshëm i shitjes së narkotikëve.
Sipas Policisë, janë sekuestruar një apartament 62 m2 dhe një dyqan 73 metra katrorë në qytezën e Cërrikut, dy automjete dhe një motor. Vlera totale e këtyre pasurive, sipas Policisë, arrin në rreth 1 milionë euro.
Shifra duket se është tërësisht e ekzagjeruar dhe është e pakuptueshme se cilën njësi vlerësimi ka përdorur policia e Elbasanit për të vendosur vlerën e aseteve në pronësi të Skënderit.
“Boldnews.al” konsultoi të dhënat publike mbi vlerën e shitjes së apartamenteve në Cërrik.
Në një njoftim të fundit, një person shet një apartament me sipërfaqe 76 metër katror, të mirë-mobiluar, në vlerën 45 mijë euro. Ka shumë apartamente të tjera, të cilat shiten akoma edhe më lirë.
Po ashtu, vlera e dyqaneve në zonën e Cërrikut, për sipërfaqe të ngjashme me atë që i është sekuestruar Eris Skënderit, arrin në maksimumi 60 mijë euro, ndërkohë që mund të gjenden lehtësisht njësi tregtare me çmim shumë më të ulët.
Ndërkohë, Policia thotë që i ka sekuestruar këtij shtetasi edhe dy automjete. Pra, nëse ecin me logjikën e çmimeve, dhe nëse dy pasuritë e paluajtshme kanë kushtuar në total 100 mijë euro, atëherë, me llogaritë e uniformave blu, dy automjetet duhet të kushtojnë 900 mijë euro.
Kjo vlerë ka kuptim, vetëm në rast se lloji i mjeteve mund të jetë Ferrari apo Rrolls Royce. Dhe jo nga ato të vjetrat e të lirat, por i bie të jenë makina të ngjashme me ato që përdor Messi apo Ronaldo.
E, nëse dikush në Shqipëri do të kishte nga ato lloj mjetesh, natyrisht nuk do të kishte kaluar pa u vënë në re në rrugët e qyteteve, aq më tepër të Cërrikut.
Por, duket se Skënderi i Cërrikut nuk ka asnjë lidhje me lojtarët me famë botërore dhe vlera e pasurisë së tij, të vendosur nën sekuestro, është shumë larg 1 milionë euro.
Atëherë, përse i është dashur Policisë që të publikojë një njoftim me shifër tepër të fryrë?
Fakti që vendosen nën sekuestro pasuri të një shtetasi me dyshimet se janë krijuar nga aktiviteti kriminal është mëse i mjaftueshëm për të treguar se ka një lloj reagimi nga institucionet ligjzbatuese.
Ndoshta, shifra e fryrë shërben si statistikë dhe për të “treguar” se po punohet, ndërkohë që Elbasani ka plot pasuri, në vlera miliona euro, të personazheve të lidhur me krimin, dhe që vijojnë të shfrytëzohen normalisht prej tyre apo familjarëve të tyre.
