Ish-Presideti Donald Trump sulmoi ashpër prokuroren e përgjithshme të Nju Jorkut dhe gjykatësin e çështjes civile ndaj tij, ndërsa u hap seanca e parë të hënën në Nju Jork. Zyra e Prokurorit të Përgjithshëm të Nju Jorkut e akuzon zotin Trump se ka siguruar qarkullimin e më shumë se 1 miliard dollarë duke mashtruar lidhur me vlerën e pasurive të tij të paluajtshme.
Prokurorja e Përgjithshme, Letitia James, po kërkon të paktën 250 milionë dollarë gjobë, ndalim të përhershëm të zotit Trump dhe djemve të tij Donald Jr dhe Eric nga drejtimi i bizneseve në Nju Jork dhe një ndalim pesëvjeçar të veprimtarive të pasurive të paluajtshme komerciale të zotit Trump dhe Organizatës Trump.
Ish-Presidenti Donald Trump doli të hënën para një gjykate në Nju Jork në një proces gjyqësor civil që mund t’i kushtojë atij kontrollin e disa prej pronave të tij më të rëndësishme . Të hënën në seancën e parë palët paraqitën argumentat hapëse.
“Gjyq i turpshëm”, deklaroi zoti Trump në një moment pushimi rreth drekës, pasi dëgjoi përfaqësuesit e zyrës së Prokurores së Përgjithshme të Nju Jorkut, Letitia James, që e cilësuan atë një gënjeshtar patologjik.
Në padinë e ngritur nga shteti i Nju Jorkut, manjati i bizneseve i kthyer në politikan, akuzohet se ka mashtruar bankat, kompanitë e sigurimeve e të tjerë, duke deklaruar për vite të tëra të dhëna të rreme në pasqyrat financiare të kompanive të tij.
“Ata kanë gënjyer vit pas viti”, tha Kevin Wallace, përfaqësues i zyrës së zonjës James, në prani të zotit Trump.
Si përgjigje avokatët mbrojtës, të ish-presidentit thanë se pasqyrat financiare ishin të ligjshme. Pronat e zotit Trump sikurse “Mona Liza”, kanë një vlerë shumë të lartë tha avokatja Alina Habba.
“Ky nuk është mashtrim. Këto janë pasuri të paluajtshme”, tha ajo, duke akuzuar zyrën e Prokurores së Përgjithshme për “vendosjen e një precedenti shumë të rrezikshëm për të gjithë pronarët e bizneseve në shtetin e Nju Jorkut”.
Zoti Trump u paraqit vullnetarisht në gjyqin civil kundër tij të cilin ai e quajti “vazhdim të gjuetisë më të madhe të shtrigave të të gjitha kohërave”. Kandidati kryesor republikan në garën presidenciale të vitit 2024, përsëriti pretendimet se zonja James, një demokrate, po përpiqet të pengojë kthimin e tij në Shtëpinë e Bardhë.
