Gjatë një takimi informal me gazetarët, kreu i SPAK, Altin Dumani ka deklaruar se një grup avokatësh, vendas dhe të huaj janë bërë bashkë për të rrëzuar përmes vendimeve të gjykatave, bisedat e zbërthyera të aplikacionit “Sky ECC” dhe “EncroChat”, ku shumë eksponentë të krimit të organizuar dhe zyrtarë dalin të implikuar në veprimtari kriminale. Këto biseda kanë hapur një debat në vendin tonë nëse duhet të merren apo jo si prova nga SPAK.
Së fundmi, me kërkesë të disa gazetareve në Angli, NCA njohur si FBI angleze, ka publikuar të dhënat e operacionit më të madh policor në historinë e Britanisë së Madhe, njohur si “Operation Venetic” bazuar në të dhënat e përftuara nga aplikacioni “EncroChat”, i cili kishte 10.000 abonentë në Angli, mes tyre edhe shqiptarë. Rasti më i fundit i dënimit të shqiptarëve është ai i djeshmi, ku Xhuljan Shehu, përdorues i EncroChat, i dënuar me 11 vite burg.
Statistikat deri në Qershor të vitit 2022 për bisedat e krimit në “EncroChat” në Angli janë:
– Arrestuar: 2,864 persona
– Ngritur akuza: 1,571 persona
– Dënuar: 383 persona
– Drogë e klasit A e kapur: 9,296 kg
– Kanabis i kapur: 8,938 kg
– Armë zjarri të kapura: 170
– Municion i kapur: 3,404 fishekë
– Kapur cash: 76,914,57 paund
