SPAK ka mbyllur hetimet për Kristo Agalliun dhe Agron Duraj të cilët akuzohen për shitblerje votash në zgjedhjet e 14 majit.
Gjykata e Posaçme ka dhënë masën e sigurisë “arrest shtëpie” për Agalliun, i akuzuar për “korrupsion aktiv në zgjedhje”, ndërsa Duraj është proceduar në gjendje të lirë për korrupsion pasiv në zgjedhje.
“Nga hetimi i këtij procedimi penal ka rezultuar se, në datën 09 Maj 2023, i pandehuri Kristo Agalliu i ka ofruar shuma monetare të pandehurit Agron Duraj për të ndikuar në vullnetin e këtij të fundit, në mënyrë që të votojë një kandidat të caktuar në Zgjedhjet për Organet e Qeverisjes Vendore, që janë zhvilluar datën 14 Maj 2023”, njofton SPAK.
Në një video të publikuar në media shihet 61-vjeçari Duraj teksa komunikon në telefon me personin që sipas hetimeve është Kristo Agalliu.
“100 mijë lekë është turp. Ja marrim por është turp 100 mijë lekë. Ti 2 vota ke, unë kam 4 vota. Po mirë unë kam makinë vetë, ç’e dua makinën atje. Të më hedhë karburantin ai. E ul pazarin nga e keqja. 100 mijë lekë dhe 50 mijë lekë naftë. Pazari i fundit”, dëgjohet teksa thotë Duraj.
