Ka ardhur reagimi i parë për mediat, nga një përfaqësues i PD-së, në lidhje me humbjen në zgjedhjet e pjesshme për Bashkinë e Kukësit.
Në një prononcim për MCN Live, ish-ministri i Jashtëm Aldo Bumçi tha se Rama hodhi miliona në një qytet të varfër, për të treguar se “s’ka ndryshuar gjë”.
“Si mundet pas një skandali të fitosh më thellë? Njerëzit janë qenie racionale, kur ndodh një skandal ti reagon. Në Kukës ka ndodhur ajo që ndodhi në Peshkopi. Kur qeveria përqendrohet i ka të gjitha mekanizmet. Zgjedhjet e pjesshme edhe normalisht janë të vështira, jo më me Edi Ramën. Mes këtyre skandaleve, të inceneratorëve, fondeve të bujqësisë që u ndërprenë, skandalit të sterilizimit dhe McGonigal, Rama do të tregojë që asgjë s’ka ndryshuar, ‘unë ju shtyp me këmbë!’, dhe ka hedhur miliona në një qytet të varfër, qyteti më i shpopulluar në Shqipëri, për të treguar se s’ka ndryshuar gjë. Jo gjithçka ka ndryshuar. Unë ju mora Peshkopinë, Rrogozhinën, është e njëjta situatë”, tha Bumçi.
