Autoritetet spanjolle, kanë goditur grupin kriminal “Karteli Ballkanik”, dhe kanë arrestuar një prej pjestarëve të tij, raportojnë mediat e huaja këtë të martë.
Gjatë operacionit raportohet se janë zbuluar dhe sekuestruar rreth 1700 kilogramë kokainë, ndërsa në pranga ka rënë një shtetas shqiptar, identiteti i të cilit ende nuk bëhet me dije.
I arrestuari kishte ardhur nga Shqipëria për të mbikëqyrur transaksionin dhe ka trajnime ushtarake dhe njohuri të larta operacionale, thuhet në deklaratën e Agjencisë Tatimore dhe Policisë Kombëtare.
Kokaina ishte fshehur në kontejnerë me fruta deti nga Ekuadori në mënyra të ndryshme, duke përdorur vrima në frigoriferin e kontejnerëve, duke projektuar dysheme false mbi to ose trarë me zgavra brenda për të vendosur lëndën narkotike.
Hetimi filloi kur u bë e ditur se rrjeti mund të importonte kontejnerë detarë me fruta nga Ekuadori në baza javore që do të fshihnin sasi të konsiderueshme droge.
