Gjykata e Lartë ka rrëzuar dy rekurse të kryetarit të zgjedhur të bashkisë Himarë, Fredi Beleri.
Përmes avokatëve të tij, Beleri ka kërkuar një masë më butë sigurie se arresti me burg.
Më herët Belerit i është refuzuar liria edhe nga Apeli e Gjykata e Posaçme.
Beleri mbahet në burg që prej 12 majit të këtij viti pasi u arrestua për blerjen e votave, në prag të zgjedhjeve lokale të 14 majit.
Prokuroria e akuzon fituesin e zgjedhjeve në Himarë se u ka dhënë 40 mijë lekë të reja 8 qytetarëve për të votuar në favor të tij në zgjedhjet lokale.
Beleri nga ana tjetër ka mohuar akuzat dhe e ka quajtur arrestimin e tij “politik”, të kryer me urdhër të kryeministrit Edi Rama.
Mbajtja e tij në burg ka sjellë një përplasje me Athinën zyrtare e cila e akuzon po ashtu qeverinë shqiptare se po e mban në qeli politikisht Fredi Belerin për të mos i lejuar betimin si kryebashkiak.
