Bosi mafioz italian Matteo Messina Denaro, i shtruar në repartin e të burgosurve të spitalit L’Aquila, është në gjendje kome të pakthyeshme. Mediat italisne bëjnë të ditur se në mbrëmje mjekët do të ndërpresin ushqyerjen. Gjendja e ish-shefit të Cosa Nostra-s, që vuante nga kanceri i zorrës së trashë ishte përkeqësuar ditët e fundit.
Për disa ditë Messina Denaro nuk kishte mundur të ushqehej e pavarur. Më 12 shtator trajtimet u pezulluan dhe u mbajtën vetëm terapitë.
Matteo Messina Denaro u arrestua më 16 janar, teksa po shkonte në një nga klinikat më prestigjioze të Palermos për t’iu nënshtruar kimioterapisë. Një sëmundje trevjeçare, e cila sipas mjekëve nuk i lë më asnjë shpresë. Pas arrestimit, bosi i mafies Castelvetrano u dërgua në burgun e L’Aquila-s, ku iu nënshtrua trajtimit për kancerin e zorrës së trashë të zbuluar në fund të vitit 2020. I ndjekur vazhdimisht nga ekipi i Onkologjisë i spitalit L’Aquila ai u trajtua në qeli, ku i ishte ngritur një lloj infermierie. “Kumbari” deri para një muaji ishte në gjendje të mirë.
Megjithatë, pas dy ndërhyrjeve, situata u përkeqësua dhe u urdhërua shtrimi në repartin e të burgosurve të spitalit. Ditët e fundit, duke pasur parasysh përkeqësimin e kushteve të kreut mafioz, ai fillimisht iu nënshtrua terapisë së dhimbjeve. Vizitat e pak familjarëve të pranuar në javët e fundit janë pezulluar. Messina Denaro mundi të njihte vajzën e saj Lorenza Alagna dhe i dha mbiemrin. Mirëpo, nuk ka pasur takime mes të dyve, pasi ai preferoi të mos shihej nga vajza e tij në gjendjen e rëndë në të cilën ndodhej.
