Natën e 26 Marsit të këtij viti, drejt godinës së televizionit Top Channel u zbraz breshëria e kallashnikovit, ku të shtënat me armë i morën jetën rojës së godinës, shtetasit Pal Kola, 60 vjeç. Roja i sigurisë ka qenë duke u ngrohur pranë një ngrohëse që ka pasur brenda kabinës në momentet që e ka zënë një plumb rikoshetë dhe ndërrioi jetë rrugës për në spital.
Ky dyshohet si një atentat i mirëorganizuar nga krimi, teksa autorët e përfshirë në këtë ngjarje dyshohet të kenë qenë tre persona. Pak minuta pas atentatit, Policia gjeti një makinë të djegur tip “Range Rover” në Golem të Kavajës, e cila dyshohet se u përkiste autorëve. Por, edhe pse kanë kaluar disa muaj nga kjo ngjarje e rëndë, ende nuk kemi asnjë person të arrestuar si autor të dyshuar.
Mbrëmjen e djeshme, gazetari Artan Hoxha, deklaroi në emisionin “Të Paekspozuarit” se një prej autorëve të dyshuar të sulmit ndaj Top Channel, është arrestuar në datën 7 Gusht në qytetin e Vlorës, teksa do të kryente një tjetër atentat. Sipas tij, drejtësia po punon për ta kthyer atë në një të penduar.
“Është kapur një person që dyshohet për sulmin ndaj Top Channel. Është kapur në 7 gusht, ka qenë në jug për të kryer atentat. Është i dyshuar si autor, në sulmin që i është bërë medias kombëtare Top Channel. Kishte mesazh për botën e medias. U godit një media e madhe dhe kaloi në heshtje. U kap i armatosur, për të kryer atentat. Pra është person i dyshuar si vrasës me pagesë. Nga hetimet e deritanishme, ata kanë çuar mesazh kërcënimi ndaj Top Channel, roja ka marrë plumbin. Po punohet që ai të kthehet edhe në bashkëpunëtor, meqenëse është kapur në ngjarje flagrante. Jemi ende larg pjesës për çfarë ndodhi ai sulm. Media nuk është sulmuar në këto nivele dhe përmasa. Kështuqë është një gjë që ngelet për t’u parë në ditët në vijim“, tha Hoxha.
Por, kush u arrestua në datën 7 Gusht në Vlorë?
Në këtë datë nga uniformat blu u vu në pranga shtetasi Amarildo Nikolli (Xhanej), 35 vjeç, nga Shkodra, i cili u kap me armën pistoletë me silenciator me vete në shëtitoren Lungomare.
I njohur me nofkën “shkodrani”, Amarildo Nikolli dyshohet se është një vrasës me pagesë dhe kishte mbëritur në qytetit bregdetar për të kryer një vrasje në afërsi të komplesit “Oslo”, zonë kjo ku vepron grupi i Edison Harizajt, i njohur ndryshe si “Edison Faqedjeguri”, mik i Shullazit dhe është ekzektuar në nëntor të vitit 2018.
“Killeri” me pagesë Amarildo Nikolli rezulton të ketë precedentë të mëparshëm në Itali, ndërsa në Shqipëri nuk ishte i skeduar. Në momentin e kapjes ai ishte me pantallona të shkurtra dhe një bluzë. Ndërkohë në çantë ju gjetën dhe një palë rroba të tjera, arma me silenciator një kapuç dhe doreza plastike. Këto sende kanë krijuar dyshimin dhe bindjen te policia se “Shkodrani”, kishte mbëritur në Vlorë për të bërë vrasje dhe nëse do kryente krimin në ikje e sipër të ndërohej.
Burime jozyrtare në atë kohë bënë me dije se objektiv i atentatit ishte Inez Hajrulla, biznesmeni që dyshohet se u ka shpëtuar disa ngjarjeve kriminale gjatë këtij, të cilat policia i ka parandaluar në kohë.
Nga hetimet e grupit hetimor, dyshohet se Amarildo Nikolli shoqërohej në pastiçeri dhe nga dy persona të tjerë ende të paidentifikuar, të cilët në momentin e arrestimit të tij janë larguar me vrap. Pamjet e tyre u panë në kamera, por ende nuk dihen emrat e dy personave që shoqëronin “Shkodranin” e armatosur gati për të bërë vrasje.
Nikolli ishte strehuar për më shumë se një muaji në Vlorë së bashku me të dashurën e tij, në një banesë në zonën e hyrjes së qytetit.
