Pavarësisht se nuk ka ligj në Shqipëri që ndalon “tullumbacet” me azot, Policia e Shtetit ditën e sotme ka arrestuar ditën e sotme një personazh të njohur të ‘Tik Tok-ut’.
Bëhet fjalë për 21-vjeçarin e identifikuar Arjan Toçi (i njohur ndryshe si “Sheiku i Durrësit”) i cili në tabakinon e tij reklamonte në rrjetet sociale këto produkte të rrezikshme për shëndetin madje i bënte thirrje të rinjve që t’i blenë.
“Sekuestrohen bombolat e gazit që dyshohet se përmbajnë lëndë të rrezikshme për shëndetin. Specialistët e Seksionit për Hetimin e Krimeve Ekonomike dhe Financiare të DVP Tiranë, në vijim të punës për evidentimin dhe goditjen e të gjitha rasteve të paligjshmërisë, pas publikimit të një videoje në rrjete sociale, në të cilën shfaqej një shtetas që reklamonte bombola me lëndë të rrezikshme për shëndetin (azot), menjëherë kanë organizuar punën për kapjen e tij. Falë veprimeve të shpejta hetimore është bërë identifikimi, kapja dhe arrestimi i shtetasit A. T., 21 vjeç, banues në Tiranë. 21-vjeçari tregtonte në tabakinon e tij, në rrugën “Tre Dëshmorët”, bombola të kontrabanduara që dyshohet se përmbajnë lëndë të rrezikshme për shëndetin”, njofton policia.
Në cilësinë e provës materiale u sekuestruan bombolat që u gjetën gjatë kontrollit në këtë tabakino.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
- Çfarë deklaroi dje Taulant Balla?
Kujtojmë që ditën e djeshme ishte vetë ministri i Brendshëm, Taulant Balla ai i cili pohoi se nuk ka ligj që e ndalon këtë lëndë (tollumbacen) por paralajmëroi se do të hartohet ligji i ri.
“Lëndë e palejuar edhe pse ligji e ka lejuar. Jemi duke bazuar në disa konventa që e konsiderojën si lëndë që duhet të vendoset nën kontrollin e shtetit. Do e ndalojmë, derisa të bëjmë ligjin do bazohemi në konventat që e cilësojnë si drogë. Policia po e bazon veprimin e vet në mungesë të legjislacionit që do e sjellin shumë shpejt në Kuvend për ta klasifikuar këtë formë të oksidit të azotit në një lëndë të palejuar, edhe pse ligji e ka lejuar. Ka hyrë në Shqipëri duke paguar edhe doganën. Duhet vendosur nën kontrollin e shtetit për mënyrën e përdorimit të saj, Është përdorur në klinika dentare për fëmijët e vegjël për të bërë ndërhyrje. Ta çojmë të gjithë së bashku këtë paketë të sigurisë në shkolla”, deklaroi ditën e djeshme Balla.
