Kryetari i PD-së, Sali Berisha dha detaje lidhur me temat e diskutimit gjatë mbledhjes së sotme të deputetëve demokratë në Kukës.
Në një prononcim për gazetarët, Berisha tha se u diskutua gjerësisht mbi axhendën parlamentare. Ai tha se kandidati i koalicionit opozitar “Bashkë Fitojmë” për Kukësin në zgjedhjet e parakohshme që zhvillohen të dielën, ka marrë mbështetjen e deputetëve demokratë në mbledhje.
“U shpreh solidariteti i plotë me Emri Vatën, i cili garon në Bashkinë e Kukësit pas një demaskimi moral dhe të gjithanshëm të përfaqësuesit të Edi Ramës, i cili ishte një copy-paste i Edi Ramës. Emri Vata ka besimin e plotë të të gjithë deputetëve të PD, besim se ai votën do e kthejë në shërbime transparente dhe përkushtim për qytetarët e Kukësit. Është rasti t’u bëj thirrje të gjithë kuksianëve, kudo që ndodhen, por që kanë qendrën e votimit në Kukës, të vijnë ditën e diel dhe me votën e tyre të firmosin fillimin apo agun e një ndryshimi të madh që e pret Shqipërinë. Në mbledhje u diskutua gjerësisht mbi axhendën parlamentare, u morën vendime të cilat zoti Bardhi do ua komunikojë. Unë them se ishte një mbledhje shumë e frytshme”, tha Berisha.
