Prokuroria e Posaçme për Krimin e Organizuar të Malit të Zi ka arrestuar kryetarin e komunës së Budvës Milo Bozhoviç, zyrtar i ish- Frontit Demokratik, parti kjo pro-serbe dhe pro-ruse në Malin e Zi.
Ai është mes 21 të arrestuarve të bandës që akuzohen për kontrabandë me më shumë se katër tonë kokainë, pastrimin e miliona eurove, shpërdorim detyre dhe armëmbajtje pa leje.
Të paktën tetë policë dhe operativë janë akuzuar, përfshirë oficerin e policisë Lubo Miloviçin, që është arratisur, Petar Lazoviç, punonjës i Agjencisë së Sigurisë Kombëtare, i cili është në paraburgim dhe Dejan Knezheviç, i cili ishte ndihmës drejtor i Administratës së Policisë së Malit të Zi.
Aktakuza përfshinë edhe Radoje Zvicer, i cili është në arrati dhe njihet si njëri nga drejtuesit e dyshuar të klanit kriminal “Kavaçki”.
Prokurori i Posaçëm Vukosh Radonjiç tha se “ata akuzohen për vepra penale të kryera nga viti 2019 deri në shkurt 2021 në Mal të Zi, por edhe në disa vende të Evropës dhe Amerikës së Jugut”.
Në vitin 2021, Europoli u dorëzoi institucioneve shtetërore malazeze transkriptet e bisedave të koduara të anëtarëve të klanit përmes aplikacionit SKY.
Në atë dokument, të publikuar vitin e kaluar nga portali “Libertas”, i cili kishte qasje në atë dokument, ndër të tjera thuhej se “Policët Petar Lazoviç dhe Lubo Miloviç, ishin anëtarë të klanit “Kavaçki” dhe ishin drejtpërdrejt të përfshirë në kontrabandën e sasive të mëdha të kokainës nga Ekuadori në Bashkimin Europian dhe në Australi”.
Për zotin Miloviç është lëshuar një fletarrest ndërkombëtar, ndërsa për Petar Lazoviçin është arrestuar në korrik të vitit të kaluar dhe prej atëherë është në paraburgim.
