Ka marrë fund arratia e shtetasit Aleks Likaj, i shpallur në kërkim, për trafik droge.
36-vjeçari, pjesë e një grupi kriminal, është dënuar në vitin 2019 me “Arrest me burg” nga Gjykata e Tiranës, pasi në bashkëpunim me antarët e tjerë të grupit, trafikonte përmes kufirit të gjelbër me Greqinë, lëndë narkotike.
Likaj është kapur këtë të dielë në Sarandë, dhe është shoqëruar për veprime të mëtejshme proceduriale.
“Shërbimet e Komisariatit të Policisë Sarandë, kanë lokalizuar, kapur dhe ndaluar shtetasin e shpallur në kërkim kombëtar, Aleks Likaj, 36 vjeç, banues në Sarandë.
Në vitin 2019, Gjykata për Krimet e Rënda, Tiranë, i kishte caktuar shtetasit Aleks Likaj, masën e sigurisë “Arrest në burg”, për veprën penale “Trafikimi i narkotikëve”, kryer në formën e grupit të strukturuar kriminal. 36-vjeçari dhe shtetas të tjerë (të vënë në pranga gjatë megaoperacionit ndërkombëtar “Brezi i Gjelbër”), të organizuar si grup kriminal, trafikonin përmes kufirit të gjelbër me Greqinë, lëndë narkotike.”,- njofton Policia.
Materialet procedurale i kaluan Prokurorisë, për veprime të mëtejshme.
