Organizata e Veteranëve të Luftës së UÇK-së ka mbajtur një protestë simbolike para zyrave te EULEX-it për të kundërshtuar aksionet e Zyrës së Prokurorit të Specializuar dhe EULEX-it të cilët kanë bastisur disa lokacione në Kosovë.
Sipas organizatorëve të protestës, EULEX dhe Zyra e Prokurorit të Specializuar po shqetësojnë familjet e bashkëluftëtarëve dhe dëshmoreve duke dërguar pa paralajmërim njerëz me maska.
Faton Klinaku tha se me vullnet do ti dorëzonin telefonat nëse këtë gjë do t’a kërkonte policia e Kosovës.
Ai theksoi se nuk e kupton idenë e konfiskimit të telefonave te tyre, pasi ai beson se përgjohen gjatë gjithë kohës.
Klinaku tha se edhe dhomat e specializuara edhe Eulex-i po punojnë për llogari të Serbisë dhe kundër Kosovës, gjë që po dëshmohet edhe ne sallën e gjykatës.
Si simbolike, meqë në të gjitha veprimet e Eulex-it dhe dhomave te specializuara janë konfiskuar disa telefona personal, protestuesit hodhën telefona në hyrje te zyrave të misionit evropian për sundimin e ligjit.
Me kaq u mbyll protesta, ndërsa telefonat u mblodhën nga punonjësit e Eulex-it. Protestuesit thanë se do të ketë edhe protesta të tjera në ditët në vazhdim.
