Partia Socialiste kërkoi shtyrjen për në seancën e radhës të projektligjit për rritjen e pagës së anëtarëve të Gjykatës Kushtetuese. Numrat e pamjaftueshëm në sallë, si nga ana e mazhorancës, ashtu edhe nga demokratët për të bërë 84 vota, detyroi Partinë Socialiste që të kërkonin shtyrjen e p/ligjit për rritjen e pagave të anëtarëve të kushtetueses në seancën e javës së ardhshme.
Kujtojmw se, sapo u rikthye në Parlament si kryetar i zgjedhur i Partisë Demokratike, Lulzim Basha njoftoi bashkimin e votës së tij dhe të deputetëve që e mbështesin me ato të Partisë Socialiste, për të rritur pagat e gjyqtarëve të Kushtetueses, një p/ligj që kërkon shumicë të cilësuar dhe numrat e mazhorancës në sallë nuk mjaftojnë për ta miratuar. Ai u kujdes që të vinte herët, ende pa nisur seanca plenare, që të shpjegonte para gazetarëve përse kishte marrë këtë vendim, ndryshe nga pjesa tjetër e opozitës.
Nismën e Ministrisë së Drejtësisë, Sali Berisha e sheh si një manovër politike për përfitime nga ana e qeverisë Rama përkundrejt Gjykatës Kushtetuese. E deleguara e kabinetit qeveritar për të replikuar me ish-Kryeministrin Berisha, Elisa Spiropali ironizoi akuzat e tij ndaj mazhorancës socialiste.
Rritja e pagave për trupën e gjykatës kushtetuese u kritikua pak ditë më parë edhe nga socialisti Fatmir Xhafaj, i cili gjatë diskutimit në komision të draftit, pohoi se një pjesë e këtyre gjyqtarëve nuk meritonin respekt, pasi sipas tij vuanin nga mungesa e dijes dhe dinjitetit.
