Ka marrë fund arratia për 37-vjeçarin Maltin (Anton) Gjini, pasi është arrestuar nga policia e Shkodrës, për shkak se akuzohet si autor i vrasjes së 44-vjeçarit Pjetër Kola.
Ndaj Maltin Gjinit, Gjykata e Pukës i ka caktuar masën e sigurisë “Arrest në burg”, për veprat penale “Vrasja me dashje”, “Mbajtja pa leje dhe prodhimi i armëve, armëve shpërthyese dhe i municionit”, dhe “Prodhimi dhe shitja e narkotikëve”.
Vrasja është regjistruar më 27 shtator të vitit 2022 në fshatin Kurthpulë të Pukë dhe shkak për konfliktin mes tyre u bë një parcelë me kanabis ku ishin bashkëpunëtorë.
44-vjeçari u pikas i plagosur rëndë në rrugë nga dy persona dhe në orën 18:00 të pasdites u dërgua në qendrën Shëndetësore të Vaut të Dejës. Duke qenë se gjendja e tij shëndetësore ishte e rëndë, Kola u nis me urgjencë ë Spitalin Rajonal Shkodër. Aty, 44-vjeçari iu nënshtruar një ndërhyrjeje kirurgjikale, por fatkeqësisht ndërroi jetë pasi nuk mundi që tu mbijetonte plagëve të marra, më konkretisht plumbit që kishte marrë në bark.
Ndërkohë që të nesërmen e ngjarjes doli një tjetër version, që në momentin e plagosjes, 44-vjeçari ka qenë me të vëllanë, i cili e ka dërguar në spital. Madje vëllai zbardhi dhe ngjarje ku tregoi dhe autorin, për të cilin drejtoi gishtin nga Maltin (Anton) Gjini, i cili është vënë sot në pranga.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
