Pasi e mbylli sezonin e kaluar si fituese e të gjithë trofeve kombëtarë, Tirana e ka nisur në mënyrën më të mirë edhe sezonin 2023- 2024 në volejbollin e meshkujve.
Bardheblutë kanë fituar Kupën e FSHV-së, teksa mbrëmjen e djeshme kanë mundur Erzenin në finalen e radhës.
Skuadra e Arben Sakos fitoi me rezultatin e pastër 3-0 pas një ndeshjeje të bukur që zgjati 1 orë e 34 minuta.
Të udhëhequr nga kapiteni Ledion Martiro, lojtari i ndeshjes me 20 pikë, kryeqytetasit u treguan më superiorë në parket se kundërshtari.
Ndërsa nga ana tjetër, shijakasit e Ilia Kojës, me gjithë dëshirën e treguar, nuk arritën të mbërrinin te trofeu në këtë kompeticion kolaudues në prag të kampionatit.
Tirana dhe Erzeni paraqiteshin në finalen e djeshme në Farkë, pasi kishin eliminuar respektivisht Vllazninë dhe Partizanin. Seti i parë nisi me luftë të fortë nga të dyja kampet, me shifrat që shkuan në 19-19.
Por më pas Tirana u tregua më e saktë në shërbim dhe më tej me dy blloqe radhazi fituese nga Ledion Martiro, për të triumfuar 25-20. Seti i dytë është edhe më i bukuri i të gjithë ndeshjes, një betejë e vërtetë, me lojën që shkon në pikët shtesë.
Por përsëri janë kryeqytetasit që tregohen më të saktë në momentet vendimtare, duke e fituar setin 27- 25, për të thelluar në 2-0. Në setin e tretë Tirana krijon epërsi që në fillim dhe e kontrollon qetësisht lojën, duke e fituar setin 25-21 dhe të gjithë takimin 3-0.
Më pas bardheblutë iu gëzuan trofeut të merituar, një sukses që u jep edhe më tepër motivim lojtarëve të Sakos në prag të Superligës.
Kupa e Federatës-Meshkuj
Tirana – Vllaznia, 3-0 (gjysmefinale)
Partizani – Erzeni, 0-3 (gjysmefinale)
Tirana – Erzeni, 3-0 (finale)
