Shqipëria do të zhvillojë një nga ndeshjet më të rëndësishme të viteve të fundit, këtë të enjte, në transfertë ndaj Çekisë.
Ky takim mund të vendosë shumë për rrugën e kombëtares kuqezi drejt Euro 2014 edhe pse pas 3 ditësh do të luajmë ndaj Polonisë në Air Albania. Skuadra e drejtuar nga trajneri Sylvinho ndodhet në Pragë që prej ditës së mërkurë, aty ku atmosfera është ndezur nga tifozët shqiptarë që mbrëmjen e djeshme.
Megjithatë, edhe pse biletat për këtë takim janë blerë nga çekët gati dy muaj më parë, vëmendja e dhënë për takimit nga mediat sportive vendase nuk është e madhe. “Isport.cz”, një nga faqet më të rëndësishme vendase i ka bërë një analizë të shkurtër, takimit të sotëm. Ata shkruajnë se kombëtarja e tyre duhet ta fitojë këtë takim dhe më pas bileta për të kaluar kufirin me Gjermaninë është thuajse e sigurt.
“Na duhen edhe 3 fitore dhe këtë mund ta bëjmë vetëm me ndeshjet në shtëpi për të shkuar në Euro 2024”, shkruan media çeke. Megjithatë, ata kërkojnë më tej që kombëtarja e tyre të bëjë kujdes nga Shqipëria, pasi vlerësohet si një kundërshtar jo i lehtë, tejet i vështirë për t’u çarë në mbrojtje. “Ata kanë emra interesante, me 7 lojtarë që vijnë nga Italia, Spanja e Anglia”, vazhdon media çeke, por edhe këtu gabojnë dhe tregojnë se nuk kanë informacionin e duhur për kombëtaren kuqezi, pasi vetëm nga Italia kanë ardhur 9 futbollistë në Kombëtare.
Ndërkohë, “seznamzpravy.cz” i ka kushtuar një shkrim Qazim Laçit, mesfushorit që është në listën e Kombëtares, por nuk do të luajë në këtë ndeshje për shkak të problemeve shëndetësore. 27-vjeçari është pjesë e Spartës së Pragës, aty ku është kthyer në një lojtar shumë të rëndësishëm. Mungesa e tij në këtë përballje shihet si një humbje e madhe nga mediat çeke, teksa e vlerësojnë Laçin si motorin e Kombëtares.
Përballja Çeki-Shqipëri do të nisë në orën 20:45, ndërsa më 10 shtator, kuqezinjtë do të presin Poloninë në Air Albania.
