Është zbardhur dëshmia e dhënë në Polici e 40-vjeçares Marsela Pushani, e cila u arrestua si autore e vrasjes së motrës së saj me thikë, Amanda Pushani, 37-vjeçe.
Burime bëjnë me dije se 40-vjeçarja ka deklaruar se vrasjen e ka kryer në kushtet e vetëmbrojtjes, pasi sipas saj, fillimisht viktima ka kërcënuar atë dhe mamnë e saj me thikë se do t’i vriste.
Marsela Pushani ka deklaruar se ka debatuar me të motrën para krimit pasi i kërkonin që të linin alkoolin, pasi pretendon se Amanda ishte problematike dhe alkoolizuar prej më shumë se 10 vitesh.
“Nuk kam dashur ta vras motrën, veprova në kushtet e vetëmbrojtjes. Prej më shumë se 10 vitesh ishte e alkoolizuar dhe problematike. Mëngjesin e djeshëm kemi pasur debat pasi i kërkonim që të linte alkoolin. Fillimisht Amanda mori thikën dhe më kërcënoi mua dhe mamanë se do të na vriste. Situata u tensionua dhe veprova në kushtet e vetëmbrojtjes”, ka thënë Marsela Pushani në Polici.
Krimi është regjistruar rreth orës 11:40 të paradites së të shtunës, ku vdekja e Amanda Pushanit u raportua fillimisht nga familjarët e saj si vdekje natyrore. Por, më pas, efektivët e policisë konstatuan në trupin e viktimës plagë të shkaktuara me thikë nga motra e saj. Marsela Pushani është arrestuar ng Policia dhe akuzohet për veprën penale “Vrasja për shkak të marrëdhënieve familjare”.
