Është shtyrë seanca në Gjykatën e Tiranës, për ish-luftëtarin e UÇK-së, Dritan Goxhaj, i cili u arrestua në Tiranë me urdhër të Gjykatës Speciale të Kosovës më 31 korrik.
Mësohet se avokatët mbrojtës kanë bërë kërkesë për ndërrimin e trupit gjykues.
Pas shtyrjes së seancës, avokati Bashkim Nikolla në një prononcim për mediat tha se Goxhaj nuk duhet që të ekstradohet, pasi sipas tij akuza që është për nxjerrje të sekretit hetimor nuk qëndron. Sipas avokatit ai është gazetar dhe këto janë bërë në sajë të punës së tij investigative.
“Ai e ushtron profesionin e gazetarit dhe nga unioni i gazetarëve në Shqipëri përshkruhet dhe se është një gazetarë investigativ që ka bërë dhe shkruar rreth problemeve politike dhe luftës. Goxhaj njihet si gazetar investigative në Kosovë dhe në Maqedoni. Një pjesë e madhe e shkrimeve të tij janë si provë në gjykatë që tregon me fakte se është i tillë”, ka thënë ai.
Dritan Goxhajt, ish-luftëtar i UÇK-së, është ndër të paktët që shkuan nga Shqipëria për të luftuar në Kosovë (së bashku me të atin, kolonelin Dilaver Goxhaj). Goxhaj i është bashkuar UÇK-së si oficer i Ushtrisë Shqiptare në shkollën e aviacionit dhe ka pasur autorizimin e Shtabit të Përgjithshëm që të mbante kontakte me komandën e forcave amerikane në Shqipëri.
Dritan Goxhaj akuzohet për kryerjen e veprave penale “Frikësimi gjatë procedurës penale” dhe “Pengimi i personit zyrtar në kryerjen e detyrave zyrtare”, parashikuar nga legjislacioni penal i Republikës së Kosovës.
“Gjykatesi i Vetem ka konstatuar se ekziston dyshim i bazuar se shtetasi D.G., mban përgjëgjesi penale për vepra penale që përfshihen në juridiksionin e Dhomave të Specializuara të Kosovës, konkretisht për frikësim gjate procedurës penale dhe pengim të personave zyrtare në kryerjen e detyrave zyrtare.” – theksohej në reagimin e Prokurorisë së Tiranës. Ai pritet të ekstradohet në Kosovë, për t’u gjykuar nga Gjykata Speciale.
