Alket Hatija, i shpallur në kërkim nga autoritetet italiane, është arrestuar. Prangosja, njoftoi këtë të mërkurë policia, u krye në një hotel në Durrës, me qëllim ekstradimin drejt vendit fqinjë.
Aksioni për kapjen e tij u krye nga policia e Durrësit dhe Interpol Tirana dhe sipas burimeve zyrtare erdhi “bazuar në informacionet e siguruara nga inteligjenca informative”.
Hatija ishte shpallur në kërkim ndërkombëtar nga Interpol Roma, pasi Gjykata e Apelit në Milano e ka dënuar atë, me 20 vjet burgim, për veprën penale “Trafikimi i lëndëve narkotike”.
“Shtetasi Alket Hatija ka bashkëpunuar me 40 shtetas të tjerë, për trafikimin e lëndëve narkotike. Gjatë periudhës 2003-2004, ky shtetas ka kryer veprimtaritë kriminale të mbajtjes, shitjes dhe trafikimit të lëndës narkotike heroinë, nga Shqipëria në Itali. 50-vjeçari ka trafikuar nga Shqipëria në Itali, me bashkëpunëtorët e tij, nëpërmjet automjeteve të transportit ndërkombëtar, sasi të mëdha droge (rreth 10 kg heroinë për çdo rast)”, thuhet më tëj në njoftimin e bluve.
Në raportimet e mediave italiane, Hatija është etiketuar si “Signore della droga” – Zoti i Drogës.
Arrestimi në 2017, lirimi nga qelia dhe debati për kryerjen e dënimit
Emri i Alket Hatisë është lakuar herë pas herë në media falë raportit të tij me institucionet e ligjzbtuese.
Në vitin 2017, ai u arrestua po në Durrës, për llogari të autoriteteve italiane, për të njëjtin vendim të vënë në pranga edhe këtë të mërkurë.
Më pas, lirua nga Gjykata e Durrësit mes debatesh të ashpra ndërsa në vitin 2021, Gjykata e Lartë vendosi ekstradimin drejt Italisë.
Vendimi i Gjykatës së Lartë erdhi pas një sorollatjeje katërvjeçare nëpër dyert e drejtësisë të një çështjeje që trazoi institucionet në Shqipëri.
Hatija u arrestua në Durrës më 8 korrik 2017 për llogari të autoriteteve italiane. Gjykata e Durrësit vendosi lirimin e tij me argumentin se dënimi në Itali është dhënë me të njëjtat shkaqe për të cilat Hatija është akuzuar, dënuar dhe vuajtur dënimin në Shqipëri dhe për rrjedhojë, nuk mund të ketë dy dënime për të njëjtën vepër penale. Këtij argumenti, Hatija i mëshoi dhe në një intervistë televizive nga arratia në Nëntor 2017.
Pak javë pas vendimit të shkallës së parë, Gjykata e Apelit Durrës ndryshoi vendimin e shkallës së parë dhe vendosi arrestin me burg të Hatisë si masë sigurie në pritje të gjykimit për kërkesën e ekstradimit.
Por ndërkohë, Hatija nuk gjendej më.
Në vitin 2018, Gjykata e Durrësit e rrëzoi kërkesën për ekstradim ndërsa u deshën tre vjet e gjysmë të tjera që Gjykata e Lartë të prishë këtë vendim dhe të urdhërojë ekstradimin e tij në Itali.
Hatija është dënuar në Shqipëri në vitin 2010 me 10 vjet e tetë muaj burg për trafik droge. Ai u lirua në vitin 2014 me vendim të Gjykatës së Elbasanit me argumentin se bashkëshortja e tij vuante nga sëmundje kronike.
