Universitetet publike kanë shpallur listat e kanidatëve fitues. Të rinjtë që kanë fituar më shumë se një program studimi do të duhet të vendosin për shkollën e lartë që do të ndjekin. Të martën e 29 gushtit nis raundi i parë i regjistrimeve.
Një ditë pas shpalljes së fituesve, dekani i Fakultetit Ekonomik, Dhori Kule, deklaron se 43% e maturantëve këtë vit kanë zgjedhur programet e ekonomisë. Për 1300 studentët e rinj të ekonomisë, fakulteti do të ofrojë zhvillimin e mësimit edhe në gjuhën angleze.
Dy raundet e regjistrimeve në universitete do të zgjasin deri më 1 tetor. Mbi 19 mijë të rinj kanë aplikuar për të ndjekur studimet e larta në universitete publike dhe private. Edhe këtë vit, numri i aplikimeve të maturantëve ishte më i ulët krahasuar me 32 mijë kuotat e miratuara nga qeveria.
Në shumë degë pritet të ketë djegie kuotash për shkak të kërkesave më të ulëta, por edhe largimit të shumë të rinjve në universitetet jashtë vendit.
Ndërkohë, pas kërkesave nga shkollat e larta, viti akademik nis më herët, më 2 tetor.
