Partia Socialiste konfirmoi mbrëmjen e djeshme se do të jetë prefekti i qarkut të Kukësit, Albert Halilaj, kandidati i tyre për kryebashkiak të Kukësit, në zgjedhjet që do të zhvillohen në 24 shtator.
Asambleja e PS në Kukës, u mblodh të enjten dhe miratoi kandidaturën e Halilajt për zgjedhjet e pjesshme, që do të mbahen pas skandalit seksual në zyrën e bashkisë nga ana e Safet Gjicit.
E teksa PS ka një kandidat, në krahun tjetër kryetari i PD-së Sali Berisha i ka bërë thirrje çdo demokrati që e ndjjen veten të gatshëm të kandidojë për Kukësin, të marrë pjesë në procesin e primareve që është thirrur prej tyre.
“Për Kukësin, ne do marrim pjesë në zgjedhje. Jemi të vetëdijshëm. Do bëjmë gjithçka për të bindur sa më shumë zgjedhës. Sikundër do bëjmë gjithçka për të mbrojtur votën në mënyrën që kemi deklaruar. Ne nuk mbrojmë votë me armë”, tha Berisha.
Por, ai hodhi posht në mënyrë kategorike një bashkëpunim me Lulzim Bashën siç është kërkuar nga grupi tjetër i PD. Berisha theksoi se në Primaret e Kukësit mund të marrë pjesë kushdo, përveç atyre që mbështesin Bashën.
“Të mendosh se mund të bësh bashkëpunim me Lulzim Bravën, është njësoj si të bashkëpunosh me Taulant Ballën. Le që të dy i kanë aferat të përbashkëta. E vërteta është se së pari, nuk di nëse Arif Rexhmati përfaqëson Bravën-Ballën në Kukës. Këtë e thotë Lulzim Brava. Duke qenë se ka mbetur në një grusht njerëzish, ai spekulime do bëjë. Por primaret janë të hapura për çdo demokrat, përveç atyre që mbështesin Bravën. Është njësoj si të mbështesësh PS-në”, shtoi ai.
