Një grup i përbërë nga shtatë shtetas shqiptarë janë vënë në pranga nga policia në Holandë, pasi rezultuan të përfshirë në trafikun e drogës gjatë gjurmimeve nga hetuesit.
Grupi në fjalë siç rezulton në dëshmitë e tyre në polici, pretendojnë se u ishte premtuar një pagesë prej mijëra eurosh për punën e tyre në Holandë që konsistonte me zhytje në det.
Ata kanë thënë se u është premtuar që do të paguheshin 2 mijë euro në fillim dhe në përfundim të punës së tyre pagesa do të arrinte në 5 mijë euro.
Shqiptarët e kanë pranuar se janë punësuar për një punë që konsistonte në zhytje në portin Vlissingen, por se nuk e kishin të qartë se çfarë do të nxirrnin nga deti.
Sakaq, pas hetimeve dhe kontrolleve të kryera nga autoritetet holandeze në Vlissingen u zbulua kokainë me vlerë 16 milionë euro.
“Dikush në Shqipëri më kërkoi të vija në Holandë dhe se duhet të angazhohesha në një punë që kishte të bënte me zhytje”, ka treguar S.K., duke shtuar se nuk i kishin shpjeguar saktësisht se çfarë duhet të bënte, dhe se çfarë duhet të nxirrte nga uji nuk i është treguar asnjëherë.
Personi në fjalë kishte bërë edhe një kurs zhytjeje në Shqipëri. Ndër të tjera ai ka thënë se nuk mund të përmendë emra, pasi i rrezikohet familja.
“Unë kam tre fëmijë, kam familje. Nëse unë përmend emra, u rrezikohet jeta”, shtoi ai.
Sipas mediave të huaja pritet që shtatë shqiptarët e përfshirë të dënohen me gjashtë vite burg.
