Një aksident i rëndë ka ndodhur orët e para të mëngjesit të sotëm në aksin Sarandë-Ksamil, në vendin e quajtur “Hidrovor”.
Sipas njoftimit të policisë, shkaktari i aksidentit ishte 17-vjeçari (pa patentë) i cili në kundërshtim të plotë me ligjin drejtonte një automjet tip ‘Mercedes Benz’.
Adoleshenti që ende nuk kishte plotësuar moshën për t’u pajisur me patentë, në një moment ka humbur drejtimin e automjetit dhe për pasojë ka përplasur motorin tip “Honda” ku udhëtonin dy shtetasit italianë.
Si pasojë e përplasjes kanë humbur jetën shtetasi italian D. G., 24 vjeç dhe një shtetas tjetër, ende i paidentifikuar, që udhëtonin me motor.
Çfarë njofton policia për aksidentin e rëndë?
“Rreth orës 03:00 të datës 24.08.2023, në aksin rrugor Sarandë-Ksamil, në vendin e quajtur “Hidrovor”, automjeti tip “Mercedes Benz”, me drejtues shtetasin E. R., 17 vjeç, është përplasur me një motomjet tip “Honda”.
Si pasojë e përplasjes kanë humbur jetën shtetasi italian D. G., 24 vjeç dhe një shtetas tjetër, ende i paidentifikuar, që udhëtonin me motomjetin tip “Honda”.
Drejtuesi i automjetit, shtetasi E. R. është dërguar në spital, bashkë me shtetasin M. R., pasagjer në automjet.
Grupi hetimor po punon për sqarimin e rrethanave të aksidentit.”, njofton policia.
Aksident i rëndë në aksin Sarandë-Ksamil, humbin jetën dy turistët italianë (DETAJE)
