Një 59-vjeçar nga Kosova është arrestuar nga policia, pasi në banesën e tij në Sarandë ka mbajtur peng 6 turistë italianë, me pretendimin se i kanë dëmtuar pajisjet në apartamentin që iu kishte dhënë me qira.
Ngjarja ka ndodhur në lagjen nr. 1 të qytetit bregdetar, ndërsa turistët e kanë filmuar të gjithë skenën, ku 59-vjeçari i ka mbajtur për rreth 60 minuta të kyçur në apartament.
Njoftimi i policisë:
shërbimet e Komisariatit te Policisë Sarandë kanë organizuar punën dhe kanë mbërritur në vendngjarje, me qëllim zbardhjen e rrethanave të rastit dhe arrestimin e autorit.
Si rezultat i veprimeve të menjëhershme të shërbimeve të Policisë, është vënë në pranga shtetasi J. A., 59 vjeç, banues në Prishtinë, si dhe është bërë lirimi i shtetasve, nga apartamenti.
59-vjeçari, për rreth 1 orë, iu ka hequr lirinë 6 shtetasve italianë, në apartamentin që iu kishte dhënë me qira, pasi pretendonte se këta shtetas i kishin dëmtuar disa pajisje në këtë apartament.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme, për veprën penale “Heqja e paligjshme e lirisë”.
