Autoriteti i Aviacionit Civil Rus ka konfirmuar se shefi i Wagner-it, Yevgeny Prigozhin ishte në mesin e 10 personave që ndodheshin në bordin e avionit të rrëzuar pasditen e së mërkurës në veri të Moskës.
Më herët mediat e huaja raportuan se të gjithë personat e ndodhur në bord kishin vdekur. Ndërkohë, kanali “Grey Zone” në Telegram, që besohet të jetë i lidhur me grupin Wagner tha se ai ishte “vrarë si rezultat i veprimeve të tradhtarëve të Rusisë”.
“Kreu i Grupit Wagner, një Hero i Rusisë, një patriot i vërtetë i Atdheut të tij – Yevgeny Viktorovich Prigozhin vdiq si rezultat i veprimeve të tradhtarëve ndaj Rusisë. Por edhe në ferr, ai do të jetë më i miri. Lavdi Rusisë”, shkruhej në reagim.
Sakaq, Agjencia Federale e Transportit Ajror ka publikuar listën e pasagjerëve në bordin e avionit të rrëzuar.
Aty bëhet me dije se në bord ndodheshin: Yevgeny Prigozhin, themeluesi i Grupit Wagner, Dmitry Utkin, bashkëthemelues, Sergej Propustin, Yevgeny Makaryan, Alexander Totmin, Valeriy Chekalov dhe Nikolai Matuseev.
Anëtarët e ekuipazhit ishin: Aleksei Levshin, komandant, Rustam Karimov, ndihmës-pilot dhe Kristina Raspopova, stjuardesë.
