Kjo nuk është hera e parë që Yevgeny Prigozhin shpallet i vdekur… dhe mund të mos jetë as e fundit.
Kreu i mercenarëve Wagner u raportua në mesin e 10 udhëtarëve të një avioni të rrëzuar në Rusi, mes dyshimeve se brenda ka pasur bombë ose është qëlluar nga toka nga mbrojtja ajrore.
Katër vite më parë, Prigozhin u shpall i vdekur pas një përplasjeje të një avioni, por që u shfaq vetëm 3 ditë më vonë. Kjo ka ngritur mjaft dyshime, si në Rusi ashtu edhe në mbarë botën, nëse kryekasapi i Wagnerit mund të “ringjallet sërish edhe një herë tjetër nga të vdekurit”.
Në tetor të 2019-ës, një avion ushtarak An-27 u rrëzua me 8 persona në bord, në Republikën Demokratike të Kongos dhe në atë rast u raportuar se Prigozhin ishte mes viktimave. Ekspertë ndërkombëtarë të sigurisë thonë se dihet tashmë që individë të shumtë kanë ndryshuar emrat e tyre duke marrë identitetin Yevgeny Prigozhin, si pjesë e përpjekjeve për të fshehur udhëtimet dhe mbrojtur atë nga tentativat për vrasje.
Edhe tani që është shpallur i vdekur, grupi Wagner ka publikuar një video të tij bashkë me krahun e djathtë, Dmitry Utkin, i cili gjithashtu raportohet mes viktimave. “Vdekja nuk është fundi, por fillimi i diçkaje tjetër”, thotë Utkin, ndërsa Prigozhin i përgjigjet: “Po, të gjithë do të shkojmë në ferr, por edhe atje, ne do të jemi më të mirët”.
