Gjashtë do të jenë politikanët që do të ndajnë qelitë me njëri-tjetrin në paraburgimin e Durrësit.
Emrave “VIP” i janë shtuar sot edhe ish-kryebashkiaku i Bulqizës, Lefter Alla (i arrestuar për shpërdorim detyre dhe korrupsion), por edhe kryebashkiaku i zgjedhur i Himarës, Fredi Beleri (i arrestuar për shitblerje votash).
Dy politikanët janë transferuar me urdhër të Drejtorisë së Burgjeve në këtë institucion penitenciar, pasi nga momenti i arrestimit kishin qëndruar në spitalin e burgut pranë QSUT-së.
Aksionet e SPAK përgjatë vitit të fundit kanë bërë kështu të mundur që klasa politike të bashkohet pas hekurave, edhe pse me shumicë dominojnë të majtët në qeli, me tre kryebashkiakë, një ish-ministër dhe një deputet që u janë vënë prangat.
Fredi Beleri do të jetë i pari politikan nga radhët e së djathtës që do t’i bashkohet paraburgimit në Durrës.
Sakaq, aty gjendet prej muajsh ish-kryebashkiaku i Durrësit Vangjush Dako, i arrestuar me urdhër të SPAK së bashku me 8 ish-zyrtarë dhe një ndërtues më 6 qershor të këtij viti.
Ndaj Vangjush Dakos rëndon akuza për shpërdorim detyre në 2 raste. Njëra për leje ndërtimi të dhënë para 11 vitesh dhe për një tender të vitit 2014-2015 që i ka shkaktuar buxhetit të shtetit një dëm prej 18 milionë lekësh.
Ish-ministri i Mjedisit Lefter Koka është vënë në pranga bashkë me dy persona të tjerë pasi akuzohet për shpërdorim detyre, pastrim parash dhe korrupsion më 14 dhjetor të vitit 2021.
Ish-kryetari i Bashkisë së Kukësit, Safet Gjici, është arrestuar më 24 qershor. Mësohet se Gjici, i cili kishte masë sigurie nga gjykata e Posaçme për korrupsion, është arrestuar në lokalin poshtë shtëpisë së tij.
Ish-deputeti i Partisë Socialiste, Alqi Bllako është arrestuar me urdhër të SPAK që në 1 prill 2022, me akuzën se ka përfituar 15 milionë lekë ryshfet, përmes babait të tij nga kompania që ndërtoi inceneratorin e Fierit.
