Nga Frank Gardner, BBC
“Një i vdekur që ecën mes të gjallëve”.
Kështu e kanë përshkruar disa ekspertë të çështjeve ruse, shefin e mercenarëve të ‘Wagner’, Yevgeny Prigozhin, që kur ai udhëhoqi marshimin e tij rebel drejt Moskës në fund të qershorit.
Reagimi fillestar i presidentit Putin ndaj asaj sfide kundër establishmentit të mbrojtjes ruse ishte i ashpër, duke e quajtur një tradhti dhe një goditje me thikë pas shpine në një video-mesazh të datës 24 qershor.
Fakti që më pas u lidh me ngut një marrëveshje, e cila e pa Prigozhinin të mbetet i lirë dhe më pas të shfaqej në Bjellorusi, në Shën Petersburg dhe këtë javë diku në Afrikë, nuk do të thotë se ai ishte i sigurt.
“Hakmarrja është një pjatë, që Putini preferon të serviret e ftohtë,” pati komentuar drejtori i CIA-s, William Burns pas kësaj ngjarje.
Një avion është rrëzuar në Moskë këtë të mërkurë teksa mediat e huaja shkruajnë se për pasojë kanë humbur jetën 10 persona, mes tyre shefi i grupit mercenar Wagner, Yevgeny Prigozhin.
BBC shkruan se aksidenti ajror ndodhi në veri të Moskës në rajonin Tver dhe bëhet fjalë për një avion privat. Raportohet se banorët e këtij rajoni dëgjuan dy zhurma para përplasjes së avionit në tokë. Avioni po udhëtonte nga Moska për në Shën Petersburg, konfirmon TASS.
