Një zjarr i përmasave të mëdha ka rënë në kurorën e gjelbërt të qytetit të Laçit pranë rrugës që të çon në kishën e Shna Ndout.
Zjarri është përhapur në një sipërfaqe të madhe duke vënë në rrezik zonën e banuar.
Në terren ndodhen forcat zjarrfikëse dhe emergjencat civile, ndërsa është ndërhyrë edhe nga ajri.
“50 efektivë të Forcave të Armatosura, helikopteri Cugar, 2 mjete zjarrëfikëse të FA dhe 4 mjete zjarrëfikëse nga MZSH Kamëz, Lezhë dhe Mirditë janë mobilizuar për të ndihmuar në shuarjen e zjarrit masiv në bashkinë e Kurbinit. Situata është sfiduese për shkak të terrenit të vështirë, ku zjarri është përhapur shpejtësisht“, njoftoi në rrjetet sociale ministri i Mbrojtjes, Niko Peleshi.
Ndërsa ministri i Brendshëm Taulant Balla shkroi në rrjetet sociale se kjo është një ndër situatat më të vështira të krijuar nga zjarret gjatë këtij viti.
“Ndërsa forcat zjarrëfikësetë gjitha bashkive pranë Kurbinit janë urdhëruar të ndërhynë, edhe Emergiencat Civile, Forcat e Armatosura dhe Forcat e Ndërhyrjes së Shpejtë janë nisur për në Laç. Policia e Shtetit ka ndalur në flagrancë njërin nga autorët e kësaj zjarrivënie (shtetasi V.H. 41 vjeç)”, shtoi ministri.
Më vonë në një njoftim zyrtar, policia lokale bëri me dije se 41-vjeçari ndezi zjarr për të djegur mbeturina, ndërsa flakët dolën jashtë kontrollit.
“Shërbimet e policisë, pas njoftimit të marrë se në një zonë malore në lagjen nr.4 në Laç, kishte rënë zjarr i cili kishte marrë përmasa duke rrezikuar edhe banesat përreth, menjëherë kanë mbërritur në vendngjarje për tu angazhuar me qëllim fikjen e tij si dhe për të kryer veprimet hetimore për përcaktimin e shkakut. Si rezultat i veprimeve të shpejta e profesionale hetimore të kryera, ka rezultuar se shkaku i rënies së zjarrit ishte djegia e disa mbeturinave nga shtetasi V. H. 41 vjeç, zjarr i cili duke u favorizuar nga kushtet atmosferike, ka marrë përmasa duke djegur një sipërfaqe masive me bimësi si dhe duke rrezikuar edhe banesat përreth. Shtetasi V.H. u arrestua në flagrancë”, thuhet në njoftimin e bluve.
