Dhjetëditëshi i fundit i muajit gusht ka rikthyer edhe njëherë temperaturat e larta në vend, teksa fundjava u mbyll me termometrin që shënoi deri në 37 gradë Celcius.
Vala e të nxehtit që ka dominuar të shtunën dhe të dielën sipas meteorologëve do të vijojë edhe në javën e re që do të nis, ku pjesa më e madhe e ditëve parashikohen me kthjellime.
Sipas parashikimit, në relievet kodrinore – malore, orët e mesditës deri ato të pasdites vonë do të ketë edhe alternime vranësirash kalimtare të cilat mund të shoqërohen me reshje shiu, me intensitet kryesisht të ulët por hera-herës, do të jenë edhe të vrullshme në formën e rrebesheve dhe shtrëngatave shoqëruar me breshër dhe shkarkesa elektrike.
Vlen për tu theksuar fakti se pavarsisht origjinës së masave ajrore nga Afrika e Veriut (të thata dhe tepër të nxehta) kalimi i tyre mbi Detin Mesdhe i bënë ato të mbushen me lagështirë. Kjo bënë që temperaturat e mesditës të ndihen disa gradë më të larta për trupin e njeriut se sa vlerat e matura në kafazin meteorologjik (vapë “mbytëse”).
Megjithatë sipas hartave të parashikuara duke filluar nga fundjava e ardhshme pritet rënie e ndjeshme e temperaturave si dhe reshje shiu në një pjesë të madhe të territorit.
