Ulja e popullsisë por edhe çmimmi i rritur ndjeshëm, kryesisht i mishit të kuq për shkak të rënies së numrit të gjedhëve në vend, ka bërë që Shqipëria të renditet e fundit për konsumin e mishit në Europë.
Një shqiptar konsumon vetëm 39 kilogramë mish në vit, thënë ndryshe 3.2 kilogramë në muaj ose afro 750 gramë në javë.
Kjo sasi është më e ulëta në Europë, njëjtë si dhe në Maqedoninë e Veriut, Moldavi dhe Turqi.
Arsyet prej të cilave qytetarët pranojnë se kanë ulur sasinë e konsumit lidhen me moshën dhe koston e lartë, ndërsa tregtarët pohojnë se vit pas viti shesin më pak mish për arsye që nisin nga çmimi e deri tek ulja e popullsisë.
Ndërkohë as blegtoria nuk është në ditën e saj më të mire, duke mos prodhuar mjaftueshëm për tregun e brendshëm e duke bërë së bashku me faktorët e tjerë që mishi i viçit nga 8500 lekë të shkojë në 12 mijë lekë.
“Ndikon rritja e çmimit por ndikon dhe largimi i njerëzve, ka më pak konsumator. Por edhe ne kemi vështirësi në furnizim, ka rënë numri i gjedhëve, dhe detyrohemi ta blejmë mishin më shtrenjtë”, tha tregtari mishit, Spartak Llanaj.
Në vitin 2022, Shqipëria kishte 12% më pak gjedhë, 2.7% më pak dele 6% më pak dhi. Edhe ajo pak sasi e nevojshme për mish në vendin tonë nuk plotësohet nga prodhimi vendas, duke bërë që tregtarët t’u drejtohen tregjeve rajonale për të furnizuar konsumatorët.
