Fitorja 2-1 në ndeshjen e parë në Letoni ka shtuar edhe më shumë shanset e Partizanit për t’u kualifikuar në raundin “play off” të Ligës së Konferencës, aty ku sipas shortit të UEFA-s, të kuqtë do të përballen me humbësin e çiftit Ludogorets-Astana (ndeshjen e parë e kanë fituar kazakët 2-1).
Ndeshja e sotme ndaj Valmierës në orën 20:00 në stadiumin “Elbasan Arena” merr një rëndësi të madhe, jo vetëm për të tentuar për herë të parë fazën e grupeve të një kompeticioni si Liga e Konferencës, por gjithashtu për financat e klubit të kuq.
Nëse Partizani ia del të kualifikohet në “play off” pas duelit të sotëm me letonezët, atëherë ka të sigurta si bonus nga UEFA shumën e 1 milion e 560 mijë eurove. Kjo shifër shkon në arkën e klubit të kuq në variantin më të pranueshëm, që do të thotë kualifikim ndaj Valmierës dhe pjesëmarrje në raundin “play off”.
Më konkretisht, për rrugën që ka bërë deri më tani në Europë dhe duke marrë të mirëqenë kalimin e turit të tretë, Partizani merr 260 mijë euro nga UEFA si klub kampion i Shqipërisë, 100 mijë euro nga pjesëmarrja në turin e parë të Ligës së Kampioneve, 250 mijë euro nga turi i dytë i Ligës së Konferencës, 200 mijë euro nga turi i tretë, si dhe 750 mijë euro nga pjesëmarrja në fazën “play off”.
Të gjitha këto shifra në total shkojnë 1 milion e 560 mijë eurove. Mirëpo, me pjesëmarrjen në “play off” ëndrra vazhdon dhe në rast se Partizani pas dy ndeshjeve në këtë raund arrin të kualifikohet dhe të shkojë në fazën e grupeve, atëherë në arkën e klubit do të shkojë shifra rekord: 3 milionë e 490 mijë euro.
Kjo është e specifikuar nga UEFA për bonusin që u shpërndan klubeve që marrin pjesën në fazën e grupeve. Ka edhe një rregull për skuadrat kampione që futen në grupe, pasi nuk u shpërndahet premioja fillestare 260 mijë euro që përfitojnë si fitues i titullit.
Ky bonus jepet vetëm për klubet që nuk arrijnë dot në fazën e grupeve. Ndërkohë, në rast se Partizani kap grupet, një fitore shpërblehet nga UEFA me 500 mijë euro, ndërsa për një barazim merr 166 mijë euro.
Praktikisht për të shkuar këtu janë tri ndeshje, duke filluar nga sot. Duhet një sforco që “demat” të futen në histori në këtë verë evropiane, për të bërë atë që realizoi pak vite më parë Skënderbeu i Mirel Josës dhe Ilir Dajës.
