20 vendet e monedhës së përbashkët dhe 346 milionë banorët e tyre, panë rritje ekonomike modeste prej 0.3%, në tremujorin e dytë të vitit, por perspektiva mbetet relativisht e dobët.
Ekonomia e Eurozonës, u rrit me një rritje modeste prej 0.3% në tremujorin e dytë të këtij viti, sipas një vlerësimi nga Eurostat, zyra statistikore e Bashkimit Europian.
Në tremujorin e parë të vitit 2023, PBB kishte mbetur i qëndrueshme në zonën e euros dhe ishte rritur me 0.2% në BE. Norma e PBB-së së bllokut, është rritur me 0.6% krahasuar me tremujorin e dytë në 2022.
Rritja e Irlandës prej 3.3%, më e madhja në Eurozonë, ndryshon pamjen e përgjithshme. Shifrat e rritjes së vendit, shpesh tregojnë luhatje të mëdha, për shkak të kompanive të mëdha ndërkombëtare, që kanë selitë e tyre atje, duke përfshirë gjigantët e teknologjisë si Meta, Google dhe Apple.
Franca dhe Spanja kishin rritje më tipike, duke u rritur përkatësisht 0.5% dhe 0.4%, por ekonomia më e madhe e Eurozonës, Gjermania, ishte në stanjacion, ndërsa Italia performoi edhe më keq, me një tkurrje prej 0.3%.
Edhe pse ka një fije shprese në shifrat e fundit, situata mbetet relativisht e dobët.
Normat më të larta të interesit, të krijuara për të luftuar inflacionin, po krijojnë vështirësi, pasi ato e bëjnë më të shtrenjtë huamarrjen, investimet dhe shpenzimet për familjet dhe bizneset.
Në bazë vjetore, Eurozona u rrit me vetëm 0.6%, performanca më e keqe, që nga recesioni 2020-2021.
Ndërkohë, punësimi në Eurozonë, është rritur me 0.2% në tremujorin e dytë, duke shënuar një rritje prej 1.5%, krahasuar me tremujorin e dytë të vitit të kaluar. / Monitor
