Efektivi 28-vjeçar i Policisë, Redin Çaushaj, i cili mbeti i plagosur mbrëmjen e kaluar, mësohet se është në gjendje të rëndë dhe prej orësh ndodhet në sallën e operacionit.
Thirrjes së spitalit të Vlorës për të dhuruar gjak gjatë orëve të mesnatës i janë përgjigjur kolegë të 28-vjeçarit, për të bërë të mundur mbajtjen në jetë të efektivit Redin Çaushaj.
Mësohet se 60-vjeçari Thodhori Mërkuri, i ka ngulur thikën në qafë 28-vjeçarit, në vend delikat, duke e lënë në gjendje kritike për jetën. Efektivi Redin Çaushaj, me detyrë inspektor i Policisë së zonës Lukovë, ishte jashtë orarit të shërbimit, në momentin kur ishte duke kaluar në rrugë dhe ka parë Thodhori Mërkurin duke u konfliktuar fizikisht me një person tjetër dhe ka ndërhyrë menjëherë për të parandaluar përshkallëzimin e konfliktit.
Gjatë përpjekjes për të parandaluar përshkallëzimin e mëtejshëm të konfliktit, njëri prej tyre, 60-vjeçari e goditi me thikë. Ngjarja ndodhi rreth orës 23:00, te kthesa e fshatit Pilur në Himarë.
Ndërkohë, autori duke perfituar nga errësira u largua nga vendi i ngjarjes, teksa është arrestuar mëngjesin e sotëm nga Policia.
