Janë zbardhur detaje të reja nga operacioni policor i koduar “Punisher 2” në kryeqytet ku u sekuestruan 11 mijë doza ekstazi që kapnin shifrën e 400 mijë euro.
Në pranga ranë 5 persona, 2 prej të cilëve ishin shtetas kosovarë. Njëri prej tyre është Besnik Mujeci, i cili është aktivist i Lëvizja Vetëvendosje. Mujeci është banues në Prishtinë dhe në zgjedhjet e fundit për Asamblenë Komunale mori 608 vota.
Dozat e ekstazisë vinin me autobusë nga Prishtina në Tiranë dhe shpërndaheshin në lokalet e natës në bllok apo në plazhet e jugut. Shtetasit u arrestuan në kryqëzimin e rrugës “Myslym Shyri” dhe “Sami Frashëri”, ku u gjetën së bashku me dërgesën me lëndë të dyshuar narkotike.
Pas lajmit se mes të arrestuarve është pjesë dhe një aktivist i Vetëvendosjes erdhi dhe reagimi për mediat kosovare nga Egzon Ademi. Ai bëri me dije se nëse gjithçka vërtetohet për Mujecin atëherë ai do të përjashtohet menjëherë nga VV.
