Mbi 1800 maturantë, të cilët kanë aplikuar në programin e studimeve për Mjekësi të Përgjithshme pranë Universitetit të Mjekësisë do të testohen ditën e nesërme për t’u përzgjedhur në 400 kuotat e përcaktuara.
Pikët e grumbulluara nga mesatarja e maturës shtetërore, të cilën Fakulteti i Mjekësisë e kërkon mbi 8.5 përbëjnë 70% të vlerësimit dhe pikët që do të marrin në testimin e nesërm përbëjnë 30 % të vlerësimit. Ky testim nis të hënën, në 14 gusht dhe zgjat deri më 23 gusht . Maturantët janë ndare ne grupe dhe janë përcaktuar oraret e testimit brenda të njëjtës ditë. Duke qenë se testimi zhvillohet online dhe pyetjet janë me alternativa, maturantët do t’i marrin përgjigjet brenda ditës.
Testimi do të zhvillohet pranë mjediseve të Qendrës së Shërbimeve Arsimore për 1813 maturantë, ndërsa Universiteti i Mjekësisë do të pranojë po ashtu edhe 30 studentë nga trojet (5 Kosova, 5 Maqedonia e Veriut, 5 Mali i Zi, 5 Presheva, 5 Bujanovci dhe 5 Medvegja), 1 nga komuniteti rom, ballkaniko dhe egjiptian, 2 persona me aftësi të kufizuar, 1 me statusin e jetimit dhe 30 transferime.
Në total numri i kuotave është 464 studentë për vitin e parë, me studentët e Mjekësisë që sipas ndryshimeve ligjore do të duhet të nënshkruajnë edhe kontratën me Ministrinë e Arsimit dhe të Shëndetësisë për punësim të detyrueshëm në Shqipëri.
Kuvendi miratoi me 71 vota pro, 23 kundër dhe asnjë abstenim projektligjin për studentët e Mjekësisë, i cili parashikon që nga viti i ri akademik i cili nis në tetor, studentët që futen në sistem, janë të detyruar të punojnë në spitalet shqiptare për një periudhë 5 vjeçare pas diplomimit.
Edhe ata që vijojnë studimet nga viti i dytë deri në të gjashtin, kanë mundësi të firmosin marrëveshjen që i detyron të punojnë 2 ose 3 vite në Shqipëri, ose në të kundërt do të paguajnë tarifë të plotë studimi.
