Kryeministrja e Italisë Georgia Meloni do të vijë ditën e nesërme ( e hënë) në Vlorë.
Burime për mediat bëjnë me dije se Meloni do të vijë nesër në Vlorë me ftesë të homologut të saj shqiptar Edi rama dhe do të zhvillojë një takim privat me këtë të fundit.
Takimi mund të zhvillohet tek rezidenca qeveritare në Dhërmi, ku Rama e ka kthyer në një traditë prej vitesh tashmë, ku pushon aty gjatë Gushtit dhe i pret aty “mysafirët’, siç ishte rasti i vjetshëm i familjes së Dua Lipës, apo më herët si takimet me familjen e Ramush Haradinajt, takim me Tony Blair apo gazetarë të huaj.
Ende nuk dihen më shumë detaje nga kjo vizitë private e Georgia Melonit në Vlorë dhe takimi që do të mbajë me Ramën.
Kujtojmë se gjatë një takimi të Komunitetit Politik Europian në Moldavi, pamjet e takimit të përzemërt mes Ramës dhe Melonit u bënë viral, ku kryeministri shqiptar e puthte në faqe homologen italiane në sy të të gjithë liderëve botërorë. Më pas, gjatë ceremonisë së varrimit të Silvio Berlusconit, ishte radha e Giorgia Melonit, e cila i dha një përqafim të përzemërt Ramës, në momentin kur u fut në Katedralen e Milanos.
